ភ្នំពេញ៖ ជនសង្ស័យជាជនជាតិខ្មែរ ចំនួន៨នាក់ ត្រូវបានសមត្ថកិច្ចនៃមន្ទីរប្រឆាំងបទល្មើសគ្រឿងញៀន ធ្វើការឃាត់ខ្លួន ពាក់ព័ន្ធករណីផលិត-កែច្នៃគ្រឿងញៀនខុសច្បាប់ និងរឹបអូសគ្រឿងញៀន២គីឡូ និង៧៦ក្រាម។ របាយការណ៍ពីមន្ទីរប្រឆាំងបទល្មើសគ្រឿងញៀន បានឱ្យដឹងថា ប្រតិបត្តិការនេះ បានធ្វើការស្រាវ និងបង្រ្កាបកាលពីថ្ងៃទី១ ខែមេសា ឆ្នាំ២០២៣ វេលាម៉ោង០២និង០០នាទី នៅចំណុច  បណ្តោផ្លូវ៦០ម៉ែត្រ មុខផ្សារទំនើប អ៊ីអនម៉ល៣ ស្ថិតនៅភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ សមត្ថកិច្ចមន្ទីរប្រឆាំងបទល្មើសគ្រឿងញៀន បានឱ្យដឹងថា នៅក្នុងប្រតិបត្តិការនេះដែរ សមត្ថកិច្ចសមត្ថកិច្ចឃាត់ខ្លួនជនសង្ស័យ៨នាក់ ( ជនជាតិខ្មែរ ) និងដកហូតវត្ថុតាងគ្រឿងញៀនប្រភេទកេតាមីន (Ketamine) ទម្ងន់២គីឡូ និង៧៦ក្រាម,សារធាតុមិនច្បាស់ ទម្ងន់១០គីឡូ និង៦៨៨,៣៤ក្រាម,ឧបករណ៍កែច្នៃគ្រឿងញៀនមួយចំនួនធំ,អាវុធខ្លី១ដើម។ បច្ចុប្បន្ន ជនសង្ស័យ និងវត្ថុតាង ត្រូវបានសម្ថកិច្ចកសាងសំណុំរឿងបញ្ជូនទៅសាលាដំបូងរាជធានីភំ្នពេញ ដើម្បីចាត់ការបន្តតាមនីតិវិធី៕