ទឹកធ្លាក់ស្មាន់ ទៀង គឺស្ថិតនៅក្នុងសហគមន៍តំបន់ការពារធម្មជាតិព្រៃធំពពេល ដែលជាសហគមន៍អេកូទេសចរណ៍ ហើយតំបន់នេះ លាតសន្ធឹងលើផ្ទៃដី៧៩៨ហិតា។ ទឹកធ្លាក់ស្មាន់ទៀង គឺជាទឹកធ្លាក់ទី៣ នៅក្នុងស្ទឹងធំពពេល ចាប់ពីអន្លង់រុនមក គឺទី១. ទឹកធ្លាក់អន្លង់រុន ទី២. ទឹកធ្លាក់ទាប និងទី៣ ទឹកធ្លាក់ស្មាន់ ទៀង។ នេះ
មិនរាប់បញ្ចូលទឹកធ្លាក់ផ្សេងៗពីស្ទឹងលឹង្គ១០០០ ព្រះអង្គធំ ក្នុងដែនរបស់សហគមន៍តំបន់ការពារ ធម្មជាតិព្រៃធំពពេលទេ។
គួររំលឹកថា សហគមន៍អេកូទេសចរណ៍ព្រៃធំពពេល ស្ថិតក្នុងឧទ្យានជាតិព្រះជ័យវរ្ម័ន-នរោត្តម "ភ្នំគូលែន" ខេត្តសៀមរាប ដែលជាទីតាំងមានសក្តានុពលធម្មជាតិជាច្រើន ដូចជាដើមឈើធំ តូច កេសកូលព្រៃ ផ្ទាំងថ្មធំៗនិងទឹកធ្លាក់ជាដើម។ ហើយទេសចរទៅកម្សាន្តនៅទីនោះ អាចបោះតង់សម្រាកក្នុងព្រៃស្ដាប់សំឡេងសត្វ ងូតទឹកធ្លាក់ និងចំណាយពេលជាមួយធម្មជាតិ។ មកដល់ពេលនេះ សហគមន៍ព្រៃធំពពេល បានចាប់ផ្ដើម ផ្លាស់ប្តូរពីការប្រើប្លាស្ទិកមកប្រើរបស់ធម្មជាតិវិញផងដែរ។ ហើយទេសចរ ដែលទៅលេងនៅសហគមន៍អេកូទេសចរណ៍ព្រៃធំពពេលមួយចំនួនធំ ក៏បានចូលរួមការកាត់បន្ថយការប្រើប្រាស់ប្លាស្ទិក ដោយពួកគាត់បានវិចខ្ចប់ម្ហូប អាហារចូលព្រៃ ដោយប្រើ
ស្លឹកចេក ឬស្លឹកឈូក។ បើតាមលោក លាស់ វណ្ណា ប្រធានការិយាល័យព័ត៌មានសហគមន៍ទេសចរណ៍ព្រៃធំពពេល បានឲ្យដឹងថា ភ្ញៀវទេសចរ ដែលចូលទៅលេងនៅទីនោះ គាត់ចូលចិត្តវប្បធម៌ខ្មែរ ហើយគាត់មិនប្រើប្លាស្ទិកទេ ដោយប្រើប្រាស់របស់ទើបបង្កើតថ្មីេ ពីធម្មជាតិ ដែលមានកញ្ជើ ល្អី ជំនួសឱ្យចានស្នោ ឬប្លាស្ទិក សម្រាប់ដាក់ម្ហូប។
សូមបញ្ជាក់ផងដែរថា សហគមន៍ព្រៃធំពពេលជាសហគមន៍ទេសចរណ៍មួយ ក្នុងចំណោមសហគមន៍ទាំង៥ នៅឧទ្យានជាតិព្រះជ័យវរ្ម័ន-នរោត្តម «ភ្នំគូលែន» មានទំហំផ្ទៃដី ៧៩៨ហិកតា។ សហគមន៍ទីនោះ មានសេវាកម្មនាំភ្ញៀវដើរព្រៃ លក់ម្ហូបអាហារ និងរៀបចំកញ្ចប់ដើរកម្សាន្ត៕
