ភ្នំពេញ៖ នៅក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី៣១ ខែមីនា ឆ្នាំ២០២៣នេះ រាជរដ្ឋាភិបាលកម្ពុជា បានសម្រេចមិនឱ្យយកលុយសម្រាប់ការផ្សាយបន្តនូវព្រឹត្តិការណ៍ប្រកួតកីឡាស៊ីហ្គេមលើកទី៣២ទៅក្រៅប្រទេស។ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានឱ្យដឹងនៅព្រឹកថ្ងៃទី៣១ ខែមីនា នេះថា សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានបញ្ជាមិនឱ្យយកលុយពីទូរទស្សន៍បរទេសនានា ដែលផ្សាយពីស៊ីហ្កេម៣២នៅកម្ពុជាទេ។
កាលពីថ្ងៃទី៣០ ខែមីនា សម្តេចតេជោ ហ៊ុន សែន បានប្រកាសលុបចោលការយកថ្លៃសំបុត្រសម្រាប់ការចូលទស្សនាគ្រប់វិញ្ញាសារប្រកួតទាំងអស់នៅក្នុងព្រឹត្តិការណ៍កីឡាស៊ីហ្គេម។ សូមបញ្ជាក់ដែរថា កាលពីថ្ងៃទី២៥ ខែមករា ឆ្នាំ២០២៣ កម្ពុជា បានរាប់ថយក្រោយ១០០ថ្ងៃ សម្រាប់ដំណើរឆ្ពោះទៅធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ។ ការរាប់ថយក្រោយ១០០ថ្ងៃនេះត្រូវបានរាជរដ្ឋាភិបាលកម្ពុជា ចាត់ទុកថា ជាព្រឹត្តិការណ៍ដ៏អស្ចារ្យនឹងក្លាយជាការពិតសម្រាប់ប្រជាជនកម្ពុជាទូទាំងប្រទេសខណៈកម្ពុជារង់ចាំឱកាសធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម អស់រយៈពេលជាង៦០ឆ្នាំមកហើយ៕
