ភ្នំពេញ៖ ការប្រែប្រួលអាកាសធាតុ បានក្លាយជារឿងដែលគួរឱ្យព្រួយបារម្ភ ខណៈបញ្ហានេះ ត្រូវបានសម្ដេចតេជោ ហ៊ុន សែន នាយករដ្ឋមន្ត្រីកម្ពុជា លើកឡើងថា មិនដឹងនឹងបញ្ចប់នៅពេលណានោះទេ។ នៅក្នុងពិធីចែកសញ្ញាបត្រដល់និស្សិតពាណិជ្ជសាស្ត្រ នាព្រឹកថ្ងៃទី៣០ ខែមីនា ឆ្នាំ២០២៣នេះ សម្ដេចតេជោ ហ៊ុន សែន បានមានប្រសាសន៍ថា បញ្ហាការប្រែប្រួលអាកាសធាតុ នៅតែជារឿងព្រួយបារម្ភ ហើយអត់ដឹងថា ចប់ពេលណាទេ។ ជាមួយគ្នានេះ ពីមួយថ្ងៃទៅមួយថ្ងៃ ការប្រែប្រួលអាកាសធាតុបានធ្វើឲ្យមានផលប៉ះពាល់ធំទូលាយ ខណៈថ្មីៗនេះ មានបាតុភូតខ្យល់កន្ត្រាក់ និងភ្លៀង រហូតដល់របួសស្លាប់ប្រជាពលរដ្ឋ។
សម្ដេចតេជោ នាយករដ្ឋមន្ត្រីកម្ពុជា បានមានប្រសាសន៍លើកឡើងថា កម្ពុជាមិនដែលកើតមានទឹកជំនន់នារដូវខែប្រាំងនោះទេ ប៉ុន្តែនៅឆ្នាំនេះ កម្ពុជា បានជួបប្រទះនឹងទឹកជំនន់ខែប្រាំង ។
សម្ដេចតេជោ បានធ្វើការណែនាំដល់ប្រជាពលរដ្ឋប្រុងប្រយ័ត្នចំពោះការប្រែប្រួលអាកាសធាតុ ហើយថា មិនដឹងថា បញ្ហានេះនាំផលអាក្រក់អ្វីខ្លះ ខណៈកម្ដៅក៏ចេះតែកើនឡើងដែលអាចនឹងប៉ះពាល់ទៅដល់ផ្នែកកសិកម្ម។ សូមបញ្ជាក់ថា នៅក្នុងសប្ដាហ៍នេះ ក្រសួងធនធានទឹក និងឧតុនិយម បានប្រកាសឱ្យដឹងពីការធ្លាក់ភ្លៀងលាយឡំដោយផ្គរ រន្ទះ និងខ្យល់កន្ត្រាក់ ដោយសារទទួលរងនូវឥទ្ធិពលខ្សោយពីជ្រលងសម្ពាធទាប និងខ្យល់ប្រែប្រួល ព្រមទាំងឥទ្ធិពលខ្សោយពីជ្រលងសម្ពាធទាប (ចិន)៕
