ភ្នំពេញ៖ ក្រុមហ៊ុនសាជីវកម្ម ស្ពាន និងថ្នល់ចិន របស់ចិន ( CRBC ) បានទទួលសិទ្ឋិលើដំណើរការសិក្សាគម្រោងផ្លូវល្បឿនលឿនរាជធានីភ្នំពេញ-ខេត្តសៀមរាប ខណៈរដ្ឋមន្រ្តីក្រសួងសារធារណការ និងដឹកជញ្ជូន បានស្នើដល់អភិបាលរាជធានី ខេត្ត និងអាជ្ញាធរពាក់ព័ន្ធ ឱ្យចូលរួមសហការ។ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តី ក្រសួងសារធារណការ និងដឹកជញ្ជូន បានឱ្យដឹងថា ដំណើរការសិក្សាលើផ្លូវល្បឿនលឿនរាជធានីភ្នំពេញ-ខេត្តសៀមរាប នឹងចាប់ផ្ដើមនាពេលឆាប់ៗខាងមុខនេះ។  លោកទេសរដ្ឋមន្រ្តី ស៊ុន ចាន់ថុល បានស្នើអភិបាលរាជធានី-ខេត្ត ជួយអន្តរាគមន៍ សម្របសម្រួលដល់អង្គភាព ពាក់ព័ន្ធ និងអាជ្ញាធរមូលដ្ឋានក្នុងដែនសមត្ថកិច្ច ដើម្បីចូលរួមសហការ ជាមួយក្រុមហ៊ុនសាជីវកម្មស្ពាន និង ថ្នល់ចិន ដំណើរការសិក្សាលើគម្រោងផ្លូវល្បឿនលឿនរាជធានីភ្នំពេញ-ខេត្តសៀមរាប បានរលូន។  បច្ចុប្បន្នកម្ពុជា បានដាក់ឱ្យដំណើរការផ្លូវល្បឿនលឿន ភ្នំពេញ-ព្រះសីហនុ ខណៈគម្រោងផ្លូវល្បឿនលឿន ភ្នំពេញ-បាវិត នឹងបើកការដ្ធាន នៅឆ្នាំ២០២៤ខាងមុខ៕