ភំ្នពេញ ៖ ជនសង្ស័យម្នាក់ និងសារធាតុញៀន ទម្ងន់ជាង១៣គីឡូក្រាម ត្រូវបានសមត្ថកិច្ច នៃមន្ទីរប្រឆាំងបទល្មើសគ្រឿងញៀន បើកប្រតិបត្តិការស្រាវជ្រាវបង្ក្រាប នៅចំណុចផ្លូវជាតិលេខ១ ក្បែរស្តុបផ្សារច្បារអំពៅ សង្កាត់ ខណ្ឌច្បារអំពៅ និងនៅចំណុចផ្ទះលេខ១០៧Eo ផ្លូវលេខ២១៧ សង្កាត់អូរឬស្សី៣ ខណ្ឌ៧មករា រាជធានីភ្នំពេញ ។ 

របាយការណ៍ពីមន្ទីរប្រឆាំងបទល្មើសគ្រឿងញៀន បានឱ្យដឹងថា ប្រតិបត្តិការស្រាវជ្រាវនេះ បានធ្វើឡើងតាំងពីថ្ងៃទី២៥ ខែមីនា ឆ្នាំ២០២៣ ដោយកម្លាំងជំនាញ (ក១០) របស់មន្ទីរប្រឆាំងបទល្មើសគ្រឿងញៀន និងឈានដល់ការឃាត់ខ្លួនជនសង្ស័យម្នាក់ ឈ្មោះ នៅ សុខ អាយុ៤២ឆ្នាំ ភេទប្រុស កើតឆ្នាំ ១៩៨២ ជនជាតិខ្មែរ និងសារធាតុញៀន ជាង១៣គីឡូក្រាម។

មន្ទីរប្រឆាំងបទល្មើសគ្រឿងញៀន បានបញ្ជាក់ឱ្យដឹងថា ចាប់យកវត្ថុតាង ចាប់យករួមមាន៖ 
១.សារធាតុញៀន ប្រភេទមេតំហ្វេតាមីន (ICE) ៨ គីឡូ និង១៤ ក្រាម។
២.សារធាតុញៀនប្រភេទមេតំហ្វេតាមីន(ទឹក) ១ គីឡូ ១៣៨ ក្រាម។
៣. សារធាតុញៀនប្រភេទអ៊ិចស្តាស៊ី(MDMA) ៤ គីឡូ ១៨៤ ក្រាម ។
៤. សារធាតុញៀនប្រភេទកេតាមីន(Ketamine) ៥៤ក្រាម និងរថយន្ត ១ គ្រឿង ម៉ាក High Lander ពណ៌ខ្មៅ ។

បច្ចុប្បន្ន ជនសង្ស័យនិងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភំ្នពេញ ដើម្បីចាត់ការបន្តតាមនីតិវិធី៕