ព្រៃវែង៖ ស្នងការដ្ឋាន នគរបាល ខេត្តព្រៃវែង បានបញ្ជាដល់គ្រប់បណ្ដាអធិការដ្ឋានក្រុង-ស្រុក និងគ្រប់ប៉ុស្តិ៍រដ្ឋបាលនគរបាល ប្រកាសព័ត៌មាន ដល់គ្រប់ច្រកល្ហកទូទាំងខេត្តព្រៃវែង ដើម្បីឱ្យយុវជនទាំងអស់ ភ្ញាក់ខ្លួន និងខិតខំរៀនសូត្រ ខណៈបញ្ហាហិង្សាដែលបង្កឡើងដោយក្រុមក្មេងទំនើងនឹងពុំត្រូវលើកលែងជាដាច់ខាត។
លោកឧត្តមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែង បានដាក់បទបញ្ជាឱ្យនគរបាលរដ្ឋបាលទាំងអស់ ចាប់ឃាត់ខ្លួនក្មេងទំនើងដែលបង្កហិង្សា ដោយដាច់ខាតត្រូវកសាងសំណុំរឿងបញ្ជូនទៅតុលាការតាមនីតិវិធី និងមិនត្រូវប្រើវិធានការអប់រំណែនាំទៀតទេ។ជាមួយគ្នានេះ លោកឧត្តមសេនីយ៍ទោ ឈឿន ប៊ុនឆន បានណែនាំដល់គ្រប់អធិការដ្ឋានក្រុង-ស្រុក និងគ្រប់ប៉ុស្តិ៍រដ្ឋបាលនគរបាល ត្រូវប្រកាសព័ត៌មាននេះ ដល់គ្រប់ច្រកល្ហកទូទាំងខេត្តព្រៃវែង ដើម្បីឱ្យយុវជនទាំងអស់បានដឹង ភ្ញាក់ខ្លួន និងខិតខំប្រឹងប្រែងរៀនសូត្រឡើងវិញ ហើយឈប់ឱ្យមានអំពើហិង្សា ការប្រើប្រាស់គ្រឿងញៀន ឬ ប្រព្រឹត្តិអំពើល្មើសច្បាប់ផ្សេងៗបន្តទៅទៀត។ គួរកត់សម្គាល់ថា បញ្ជារបស់ស្នងការនគរបាលខេត្តព្រៃវែង បានកើតឡើងក្រោយពេលនៅតាមមូលដ្ឋានមួយចំនួនកំពុងប្រឈមនឹងបញ្ហាក្រុមក្មេងទំនើង ដែលតែងធ្វើសកម្មភាពគប់កញ្ចក់រថយន្តនៅពេលយប់ និងការបង្កហិង្សានានា ដែលធ្វើឱ្យប៉ះពាល់ដល់សន្តិសុខសង្គម៕
