ភ្នំពេញ៖ សម្ដេចនាយករដ្ឋមន្រ្តីកម្ពុជា បានអំពាវនាវដល់ពលរដ្ឋខ្មែរកុំឱ្យស្លន់ស្លោពាក់ព័ន្ធការដួលរលំ នៃធនាគារអាម៉េរិក ខណៈបញ្ហានេះ អាចបង្កជាវិបត្តិសេដ្ឋកិច្ចដល់សកលលោក។ ការអំពាវនាវនេះ បានធ្វើឡើងក្នុងពិធីប្រគល់សញ្ញាបត្រជូនដល់និស្សិត វិទ្យាស្ថានវ៉ាន់ដា នាព្រឹកថ្ងៃទី២២ ខែមីនានេះ។ នៅក្នុងពិធីនេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ថា ការបង្កភាពស្លន់ស្លោ និងចង់ឲ្យអាម៉េរិក ចុះខ្សោយ ខណៈមានការដួលរលំធនាគារធំៗចំនួនពីរនៅសហរដ្ឋអាមេរិក គឺជាការខុសឆ្គងបំផុត។ សម្ដេចនាយករដ្ឋមន្រ្តីកម្ពុជា បានអះអាងថា ការចុះខ្សោយរបស់សហរដ្ឋអាម៉េរិក នឹងបង្កជាវិបត្តិសេដ្ឋកិច្ចដល់សកលលោកទាំងមូល ខណៈនៅអាម៉េរិកមានធនាគាររាប់រយ ប៉ុន្តែមានតែធនាគារប៉ុណ្ណោះ ដែលដួលរលំ។ ជាមួយគ្នានេះ សម្តេចតេជោ ហ៊ុន សែន បានមានប្រសាសន៍លើកឡើងដែរថា ប្រទេសនីមួយៗត្រូវពឹងអាស្រ័យគ្នាទៅវិញ ព្រោះអាម៉េរិក ជាក្បាលរថភ្លើង នៃកំណើនសេដ្ឋកិច្ចភពលោក ហើយពិភពលោកប្រកបដោយភាពប្រកួតប្រជែង៕
