ភ្នំពេញ៖ រាជរដ្ឋាភិបាលកម្ពុជា នឹងបញ្ចេញរថយន្តក្រុងប្រមាណ៤០០គ្រឿង ដើម្បីប្រើប្រាស់ដឹកពលរដ្ឋទៅកាន់គោលដៅនៅស្រុកកំណើត នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ។ ថ្លែងនៅក្នុងពិធីប្រគល់សញ្ញាបត្រជូននិស្សិតសាកលវិទ្យាល័យបៀលប្រាយ (BBU) នាព្រឹកថ្ងៃទី១៦ ខែមីនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា រថយន្តក្រុងចំនួន៤០០គ្រឿង នឹងត្រូវបញ្ចេញឱ្យប្រើប្រាស់ដឹកពលរដ្ឋខ្មែរ នាពេលខាងមុខ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍លើកឡើងថា ការត្រៀមរថយន្តក្រុងចំនួន៤០០គ្រឿង ដើម្បីដឹកពលរដ្ឋខ្មែរ នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិ គឺដើម្បីចូលរួមទប់ស្កាត់ការដំឡើងថ្លៃពីរថយន្តឈ្នួលផងដែរ។ ជាមួយគ្នានេះ សម្តេចតេជោ នាយករដ្ឋមន្ត្រីកម្ពុជា បានគួសបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិនាឆ្នាំនេះ សម្ដេចចង់ឱ្យប្រេងឥន្ធនៈចុះថ្លៃ ដើម្បីពលរដ្ឋមានឱកាសបានដើរលេងកម្សាន្តទៅកាន់គោលដៅឆ្ងាយៗ។ គួរកត់សម្គាល់ដែរថា នាពេលថ្មីៗនេះ លោក ឃួង ស្រេង អភិបាលរាជធានីភ្នំពេញ បានថ្លែងថា អាជ្ញាធរនឹងបញ្ចេញរថយន្តក្រុងចំនួន៤០០គ្រឿង ដើម្បីដឹកពលរដ្ឋដោយមិនយកប្រាក់ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ពីភ្នំពេញ ទៅកាន់គោលដៅខេត្តសៀមរាប និងទៅកាន់គោលដៅខេត្តបន្ទាយមានជ័យ៕