ក្រុមការងារភ្នាក់ងារទេសចរណ៍ និងក្រុម ការងារសណ្តាប់ធ្នាប់នៃអាជ្ញាធរជាតិអប្សរា ព្រមទាំងប៉ូលីសបេតិកភណ្ឌ រួមគ្នាសម្អាតបរិស្ថាននៅតាមបរិវេណជើងទំនប់ទឹកបារាយមេបុណ្យខាងលិច ដូចជាសំរាម ដបភេសជ្ជៈ ដបទឹកសុទ្ធ ផ្លាស្ទិច កញ្ចប់ស្នោដាក់បាយ និងសំរាមផ្សេងៗ ដែលនៅរាយប៉ាយ បង្ករផល់ប៉ះពាល់ដល់បរិស្ថានយ៉ាងធ្ងន់ធ្ងរដល់រមណីយដ្ឋានអង្គរ។ការងារនេះ បានបង្កើនសោភ័ណភាពបរិស្ថានស្អាត និងលើកតម្លៃរមណីយដ្ឋានអង្គរ ឲ្យកាន់តែល្អបន្ថែមទៀត។ អាជ្ញាធរជាតិអប្សរា បានអំពាវនាវឲ្យសាធារណជន ដែលបានទៅលេងកម្សាន្ត នៅតាមតំបន់នានា ក្នុងរមណីយដ្ឋានអង្គរ រក្សា និងទុកដាក់សំរាម ឲ្យមានសណ្តាប់ធ្នាប់ និងចោលសំរាមនៅក្នុងធុងសំរាម ឲ្យបានត្រឹមត្រូវ ជៀសវាងចោលពាសវាលពាសកាល នាំឱ្យបាត់បង់តម្លៃបរិស្ថាន ក្នុងតំបន់រមណីយដ្ឋានអង្គរទាំងមូល។

គួររំលឹកថា រមណីយដ្ឋានអង្គរនៅខេត្តសៀមរាប បានជាប់ចំណាត់ថ្នាក់លេខ១ ជាទីកន្លែងល្អផ្តាច់គេ ក្នុងចំណោមទីកន្លែងដែលគួរមកទស្សនាកម្សាន្ត ចំនួន២៩ នៅក្នុងតំបន់អាស៊ីអាគ្នេយ៍។ នេះបើយោងតាមការស្ទង់មតិរបស់ក្រុមហ៊ុនមគ្គុទេសទេសចរណ៍ Touropia ដែលចេញផ្សាយកាលពីពេលថ្មីៗនេះ។ ក្រុមហ៊ុនមគ្គុទេសទេសចរណ៍ Touropia បានបញ្ជាក់ថា នៅពេលនិយាយទីតាំងបុរាណវិទ្យា អ្នកទេសចរនឹងមិនចង់រំលងរមណីយដ្ឋានអង្គរ នៅខេត្តសៀមរាប ដែលស្ថិតនៅភាគខាងជើង នៃប្រទេសកម្ពុជាឡើយ។ រមណីយដ្ឋានអង្គរ បង្កប់ទៅដោយធាតុវប្បធម៌ដ៏សំខាន់ៗបំផុតរបស់ពិភពលោក រួមជាមួយនឹងប្រាសាទអង្គរវត្តដ៏ធំសម្បើម ប្រាសាទ បាយ័ន ដែលមានរូបព្រហ្មមុខ៤ធំៗ និងប្រាសាទតាព្រហ្ម ដែលជាប្រាសាទបែបព្រះពុទ្ធសាសនា ដែលគ្របដណ្តប់ដោយដើមឈើធំៗ និងខ្ពស់ៗ៕