ការសន្យានេះបានធ្វើឡើងនៅក្នុងជំនួបពិភាក្សារវាងលោកស្រីបណ្ឌិតសភាចារ្យរដ្ឋមន្រ្តី ភឿង សកុណា រដ្ឋ មន្ត្រីក្រសួងវប្បធម៌ និងវិចិត្រសិល្បៈជាមួយលោកបណ្ឌិត PARK Jung-Wook ដែលត្រូវបានរដ្ឋាភិបាលនៃសាធារណរដ្ឋកូរ៉េតែងតាំងជាឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជាកាលពីថ្ងៃអង្គារ ទី០៧ ខែមីនា ឆ្នាំ២០២៣។

នៅក្នុងជំនួបពិភាក្សានោះលោកស្រីរដ្ឋមន្ត្រីបានលើកឡើងពីកិច្ចសហប្រតិបត្តិការដ៏ល្អជាច្រើនលើវិស័យវប្បធម៌ជាមួយសាធារណរដ្ឋកូរ៉េតាមរយៈដៃគូនានា ដែលមានដូចជា ការជួសជុលប្រាសាទមួយចំនួននៅតំបន់អង្គរ, កិច្ចសហប្រតិបត្តិការជាមួយសារមន្ទីរប្រល័យពូជសាសន៍ទួលស្លែង និងសាកលវិទ្យាល័យភូមិន្ទវិចិត្រសិល្បៈជាដើម។

ជាការឆ្លើយតបលោកឯកអគ្គរដ្ឋទូតបានថ្លែងអំណរគុណចំពោះលោកស្រីរដ្ឋមន្ត្រី ដែលបានអនុញ្ញាតអោយលោកជួបសម្តែងការគួរសម និងពិភាក្សាការងារ។ លោកសន្យាថា នឹងពង្រឹងពង្រីកកិច្ចសហប្រតិបត្តិការលើវិស័យវប្បធម៌រវាងប្រទេសទាំងពីរនៅក្នុងអាណត្តិការទូតរបស់លោក៕