នៅវេលាព្រឹកព្រលឹមស្រាងៗភ្ញៀវទេសចរជាតិ និងអន្តរជាតិយ៉ាងច្រើនកុះករបានទៅអង្គុយរង់ចាំទស្សនាទិដ្ឋភាពថ្ងៃរះនៅប្រាសាទអង្គរដោយភ្ញៀវទេសចរខ្លះបានអង្គុយរង់ចាំនៅបរិវេណច្រាំងកសិន្ធុខាងមុខប្រាសាទខ្លះចូលមកអង្គុយត្រៀបត្រានៅបណ្តាល័យ និងខ្លះទៀតឈររង់ចាំនៅលើរានហាលក្បែរស្រះទឹកខាងជើង និងខាងត្បូងនៃប្រាសាទដើម្បីរង់ចាំទស្សនាទិដ្ឋភាព និងផ្តិតយករូបភាពដ៏អស្ចារ្យថ្ងៃរះនៅប្រាសាទអង្គរវត្ត។ អ្នកស្រី Garency  Fraken ជនជាតិអាមេរិកបានបង្ហាញអារម្មណ៍សប្បាយ រីករាយយ៉ាងខ្លាំង ដែលបានមកទស្សនាទិដ្ឋភាពដ៏ស្រស់ស្អាតថ្ងៃរះនៅប្រាសាទអង្គរវត្ត។ អ្នកស្រីអះអាងថា ការទស្សនាថ្ងៃរះនេះគឺជាក្តីស្រម៉ៃជាយូរមកហើយរបស់អ្នកស្រី និងគ្រួសារ ដែលប៉ងប្រាថ្នាមកកាន់ប្រាសាទអង្គរវត្ត។

អ្នកស្រីបញ្ជាក់ថា អ្នកស្រីបានមកដល់កម្ពុជាកាលពីថ្ងៃទី០៤ ខែមីនា ឆ្នាំ២០២៣ គោលដៅដែលអ្នកស្រី និងគ្រួសារមកទស្សនាមុនគេគឺប្រាសាទអង្គរវត្ត ហើយគោលដៅបន្ត អ្នកស្រីគ្រោង និងចូលទស្សនាប្រាសាទបុរាណជាច្រើនទៀតក្នុងរមណីយដ្ឋានអង្គរ។ ចំណែកកញ្ញា យាន ដានី ជាប្រជាពលរដ្ឋរស់នៅរាជធានីភ្នំពេញបានបង្ហាញអារម្មណ៍ភ្ញាក់ផ្អើលយ៉ាងខ្លាំងពេលមកដល់ខាងមុខប្រាសាទអង្គរដោយសារបានឃើញភ្ញៀវទេសចរជាតិ និងអន្តរជាតិយ៉ាងច្រើនកុះករបានចូលមករង់ចាំទស្សនាទិដ្ឋភាពថ្ងៃរះ។ កញ្ញាបន្តថា ទោះបីជាធ្លាប់បានមកទស្សនាប្រាសាទអង្គរវត្តជាច្រើនលើកក៏ដោយតែនេះជាលើកទីមួយហើយ ដែលខ្លួននិងមិត្តភ័ក្របានចូលមកទស្សនាថ្ងៃរះនៅទីនេះដោយត្រូវក្រោកមករង់ចាំតាំងពីម៉ោង៥ព្រឹក។

ពេលបានឃើញភាពស្រស់ស្អាតនៃថ្ងៃរះទន្ទឹមកំពូលប្រាសាទអង្គរវត្តឆ្លុះជាមួយស្រះទឹកបញ្ចេញពន្លឺព័ណ៌មាសហើយនោះកញ្ញា ដានី លើកឡើងថា ពិតជាមិនខកបំណងឡើយពេលដែលចំណាយពេលដើម្បីរង់ចាំទស្សនាថ្ងៃរះនៅប្រាសាទអង្គរវត្ត។ គួររំលឹកថា នៅពេលធ្វើដំណើរកម្សាន្តមកកាន់រមណីយដ្ឋានអង្គរ អ្នកទេសចរតែងចំណាយពេលដ៏មានតម្លៃក្រោកពីព្រលឹមឆ្ពោះមកប្រាសាទអង្គរវត្តដើម្បីបានឃើញភាពអស្ចារ្យនៃសម្រស់កំពូលប្រាង្គប្រាសាទអង្គរវត្ត ដែលឆ្លុះចាំងជាមួយពន្លឺព្រះអាទិត្យរះពណ៌មាស៕