លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងកាលពីថ្ងៃទី៦ ខែមីនា ម្សិលមិញបានអញ្ជើញពិនិត្យមើលស្ថានភាពភ្ញៀវទេសចរចេញចូលនៅច្រកទ្វារអន្តរជាតិទ្រពាំងក្រៀលខេត្តស្ទឹងត្រែង កម្ពុជា-ឡាវ មុនព្រឹត្តិការណ៍ប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះនៅពេលដ៏ឆាប់ខាងមុខនេះ។ ថ្លែងនៅពេលនោះ លោក អ៊ន់ ប៉ោសឿន បានឲ្យដឹងថា មកដល់ពេលនេះភ្ញៀវទេសចរចាប់ផ្ដើមមានសន្ទុះឡើងវិញហើយក្រោយពីវិបត្តិជំងឺកូវីដ-១៩។ ជាពិសេសពេលដែលប្រទេសកម្ពុជាធ្វើជាម្ចាស់ផ្ទះក្នុងការប្រកួតកីឡាស៊ីហ្គេមដោយលោកសង្កេតឃើញមានភ្ញៀវបានចេញចូលកាន់តែច្រើននៅមុនព្រឹត្តិការណ៍នេះមកដល់។

ដោយឡែកអ្នកលក់ដូរនៅទីនោះបានបង្ហាញភាពរីករាយពេលឃើញភ្ញៀវទេសចរចេញចូលច្រើនហើយមានភាពអ៊ូអរខុសប្លែកពីមុន។ ភ្ញៀវដែលចូលមកពីប្រទេសឡាវនោះដោយពួកគេតែងតែឈប់សម្រាកទទួលទានអាហារពិសាភេសជ្ជៈជាដើមរួចទើបបន្តដំណើរទៅមុខទៀត។ គួររំលឹកថា ច្រកព្រំដែនអន្តរជាតិត្រពាំងក្រៀល-ណងណុកខៀនរវាងខេត្តស្ទឹងត្រែង និងខេត្តចំប៉ាសាក់ ត្រូវបានបើកសម្ពោធកាលពីថ្ងៃទី១០ ខែមករា ឆ្នាំ២០១៧ ហើយប្រមុខរដ្ឋាភិបាលកម្ពុជា និងឡាវសុទ្ធតែមានសុទិដ្ឋិនិយមថា ការបើកច្រកទ្វាព្រំដែនអន្តរជាតិនោះនឹងជំរុញទំនាក់ទំនងសេដ្ឋកិច្ច ពាណិជ្ជកម្ម ទេសចរណ៍ និងជួយលើកកម្ពស់ជីវភាពពលរដ្ឋប្រទេសទាំងពីរកាន់តែប្រសើរ៕