នេះជាការបង្ហើបរបស់លោក Liu minglin អគ្គនាយក និងជាអនុប្រធានក្រុមប្រឹក្សាភិបាលក្រុមហ៊ុន Yunnan Investment Group ដែលសាងសង់អាកាសយានដ្ឋានសៀមរាបអង្គរខណៈសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាអនុញ្ញាតិឲ្យចូលជួបសម្ដែងការគួរសម និងពិភាក្សាការងារនៅវិមានសន្តិភាពកាលពីរសៀលថ្ងៃទី០៦ ខែមីនា ឆ្នាំ២០២៣។ លោក អ៊ាង សុផល្លែត ជំនួយការផ្ទាល់សម្ដេចតេជោ ហ៊ុន សែន បានមានប្រសាសន៍ប្រាប់អ្នកសារព័ត៌មានក្រោយជំនួបថា នៅក្នុងជំនួបនោះលោក Liu Minglin បានគោរពជម្រានជូនសម្ដេចតេជោ ហ៊ុន សែន អំពីវឌ្ឍនភាពនៃការសាងសង់ព្រលានយន្តហោះអន្តរជាតិខេត្តសៀមរាប ដែលរហូតមកដល់ពេលនេះការសាងសង់សម្រេចបាន៨៦ភាគរយហើយ។ គ្រោងដាក់ឲ្យហោះសាកល្បងនៅខែមិថុនាខាងមុខហើយដាក់ឲ្យប្រើប្រាស់ជាផ្លូវការនៅខែតុលា ២០២៣ ខាងមុខផងដែរ។
ជាមួយគ្នានោះលោក Liu Minglin ក៏មានបំណងចង់ធ្វើការផ្សព្វផ្សាយពីព្រលានយន្តហោះអន្តរជាតិខេត្តសៀមរាបនេះឲ្យបានទូលំទូលាយផងដែរ ដើម្បីជាការទាក់ទាញទេសចរណ៍ និងអ្នកវិនិយោគមកកាន់កម្ពុជា។ ក្រៅពីបញ្ហាខាងលើនេះលោកក៏បានបញ្ជាក់ពីគោលបំណងរបស់ក្រុមហ៊ុន ដែលមានបំណងចង់វិនិយោគលើវិស័យថាមពលពន្លឺព្រះអាទិត្យនៅក្នុងខេត្តសៀមរាបទៀតផង ។ សម្ដេចតេជោ ហ៊ុន សែន បានសម្ដែងការរីករាយជាមួយនឹងវឌ្ឍនភាពនៃការសាងសង់ព្រលានយន្តហោះអន្តរជាតិខេត្តសៀមរាប-អង្គរនេះ ហើយសម្ដេចបានលើកទឹកចិត្តឲ្យក្រុមហ៊ុនពន្លឿនការសាងសង់ នឹងធ្វើយ៉ាងណាឲ្យការសាងសង់នោះត្រឹមត្រូវតាមបទដ្ឋានទាំងអស់មុននឹងបើកការហោះហើរ។ សម្តេចបន្តថា ព្រលានយន្តហោះនេះមានតួនាទីធំណាស់ក្នុងការតភ្ជាប់មិនត្រឹមតែក្នុងស្រុកប៉ុណ្ណោះទេប៉ុន្តែវានឹងតភ្ជាប់ជាមួយនឹងបណ្ដាប្រទេសផ្សេងៗទៀតនៅក្នុងតំបន់និងពិភពលោក ដែលពីមុនមកព្រលានយន្តហោះខេត្តសៀបរាបមិនអាចទទួលយន្តហោះធំៗចុះចតបានទេ។
ជាមួយគ្នានោះសម្តេចតេជោក៏បានស្វាគមន៍ចំពោះបំណងរបស់ក្រុមហ៊ុនក្នុងការផ្សព្វផ្សាយដើម្បីទាក់ទាញឲ្យមានការហោះហើរមកកាន់ខេត្តសៀមរាប និងបំណងនាំទេសចរណ៍ និងអ្នកវិនិយោគមកកាន់ខេត្តសៀមរាប និងចង់វិនិយោគលើវិស័យថាមពលពន្លឺព្រះអាទិត្យនៅក្នុងខេត្តសៀមរាប។ សម្ដេចតេជោ ហ៊ុន សែន ស្នើឲ្យក្រុមហ៊ុនអាចពិចារណាបង្កើតរោងចក្រផលិតបន្ទះសូឡានៅព្រះរាជាណាចក្រកម្ពុជាដើម្បីប្រើប្រាស់នៅក្នុងប្រទេស និងនាំចេញទៅក្រៅប្រទេស៕
