ក្រុមការងារអភិរក្សថ្មរបស់អាជ្ញាធរជាតិអប្សរាកំពុងជំរុញការងារជួសជុលចម្លាក់បង្កាន់ដៃនាគដែលសាងឡើងពីថ្មភក់ចំនួន២ប្រវែង៥០ម៉ែត្រនៅផ្នែកខាងជើងស្ពានហាលមុខប្រាសាទអង្គរវត្តដោយរៀបចំដាក់ទីតាំងដើមឡើងវិញឱ្យបានមុនថ្ងៃបុណ្យចូលឆ្នាំខ្មែរខាងមុខ ដើម្បីបើកឱ្យភ្ញៀវទេសចរជាតិ អន្តរជាតិចូលទស្សនា។ បើតាមការបញ្ជាក់របស់លោក អន សុភាព អ្នកទទួលខុសត្រូវការដ្ឋានជួសជុលបានឱ្យដឹងថា ចម្លាក់បង្កាន់ដៃនាគទាំង២នេះស្ថិតក្នុងគម្រោងជួសជុលស្ពានហាលអង្គរវត្ត ហើយត្រូវបានរើចេញជាបណ្តោះអាសន្ននាពេលកន្លងមក។ បច្ចុប្បន្នដោយសារគម្រោងជួសជុលស្ពានហាលអង្គរវត្តត្រូវបញ្ចប់រួចរាល់ក្រុមការងារត្រូវយកចម្លាក់បង្កាន់ដៃនាគទាំងនោះមកធ្វើការជួសជុលពង្រឹង និងដំឡើងនៅកន្លែងដើមឡើងវិញ។
គួរបញ្ជាក់ផងដែរថា បង្កាន់ដៃនាគទាំងនេះធ្លាប់ត្រូវបានធ្វើការជួសជុលម្តងហើយនៅសម័យបារាំងនៅឆ្នាំ១៩៤៩ដោយប្រើជើងទម្រចាស់ខ្លះ និងធ្វើជើងទម្រថ្មីខ្លះៗមកដំឡើងឡើងវិញ។ ស្ពានហាលដែលជាច្រកសំខាន់ចូលទៅកាន់ប្រាង្គប្រាសាទអង្គរវត្ត។ ស្ពាននេះមានប្រវែង១៩០ម៉ែត្រទទឹងជាង១១ម៉ែត្រ និងកម្ពស់ជាង៤ម៉ែត្រ។ ស្ពាននេះសាងពីថ្មបាយក្រៀមក្រាលដោយកម្រាលថ្មភក់ និងលម្អដោយបង្កាន់ដៃនាគទាំងសងខាង។ ស្ពានបុរាណនេះគឺជាច្រកចូលដ៏សំខាន់ទៅកាន់ប្រាសាទអង្គរវត្ត ដែលទទួលភ្ញៀវទេសចរទាំងជាតិ និងអន្តរជាតិយ៉ាងតិច៥លាននាក់ក្នុងមួយឆ្នាំៗ។
ក្នុងអំឡុងទសវត្សទី៦០សាលាបារាំងចុងបូព៌ា ដែលមានតួនាទីយ៉ាងសំខាន់ក្នុងការអភិរក្សតំបន់អង្គរនាសម័យនោះបានជួសជុលស្ពាននេះមួយចំហៀងខាងត្បូងប៉ុណ្ណោះ។ ការជួសជុលការខូចខាតចំហៀងភាគខាងជើងប្រវែង១៩០ម៉ែត្រទទឹង៥,៥ម៉ែត្របន្តទៀតត្រូវរំខានដោយសារសង្គ្រាម។ កាលពីឆ្នាំ១៩៩៦ អាជ្ញាធរជាតិអប្សរាដោយសហការជាមួយសាកលវិទ្យាល័យសូហ្វីយ៉ានៃប្រទេសជប៉ុនបានជួសជុលស្ពានហាលភាគខាងជើងបានប្រវែង៩០ម៉ែត្រដោយចំណាយពេល១២ឆ្នាំ៕
