ក្រុមថែរក្សាបរិក្ខារទេសចរណ៍នាយកដ្ឋានអភិវឌ្ឍន៍ទេសចរណ៍ និងវប្បធម៌នៃអាជ្ញាធរជាតិអប្សរាបានចាប់ផ្តើមដំឡើងជួសជុលជណ្តើរឈើនៅប្រាសាទមេបុណ្យខាងកើត និងថែទាំជួសជុលសម្ភារបរិក្ខារប្រើប្រាស់ទាំងអស់សំដៅធ្វើយ៉ាងណាឱ្យកាន់តែមានសោភ័ណភាព និងរបៀបរៀបរយនេះបើតាមការឲ្យដឹងពីអាជ្ញាធរជាតិអប្សរានៅថ្ងៃទី០៤ ខែមីនា នេះ។ ប្រាសាទមេបុណ្យខាងកើត "ជារមណីយដ្ឋានទេសចរណ៍បែបវប្បធម៌ប្រវត្តិសាស្រ្ត" ។ រមណីយដ្ឋាននេះមានទីតាំងស្ថិតនៅក្នុងក្នុងបរិវេណឧទ្យានអង្គរ ដែលមានចំងាយប្រមាណជា២៧គីឡូម៉ែត្រពីទីរួមខេត្តសៀមរាប។ នៅទីនោះមានសក្តានុពលទេសចរណ៍សំខាន់ៗដូចជាប្រវត្តិនៃការសាងសង់ទីតាំង និងរចនាបទ។ នៅទីនោះភ្ញៀវទេសចរអាចមកលំហែលកម្សាន្តមើលប្រាសាទ ចម្លាក់ក្បូក្បាច់ ព្រៃព្រឹក្សា ថ្ងៃលិច​ និងប្រវត្តិសាស្រ្ត ជាដើម។ ប្រាសាទមេបុណ្យខាងកើតបានកសាងឡើងនៅសតវត្សទី១០ក្នុងឆ្នាំ៩៥២ នៃគ.ស. ដោយព្រះបាទរាជេន្ទ្រវរ្ម័នទី១ឧទ្ទិសថ្វាយដល់ព្រះឥសូរក្នុងព្រហ្មញ្ញសាសនាមានទម្រង់ និងលក្ខណៈស្រដៀងទៅនឹងប្រាសាទប្រែរូប ដែលមានប្រាង្គសំខាន់ចំនួនប្រាំសាងអំពីឥដ្ឋស្ថិតនៅលើខឿនថ្មបាយក្រៀម និងថ្មភក់។

ភាពស្រស់ស្អាតនៃសំណង់ប្រាសាទមេបុណ្យខាងកើត គឺមានសំណង់ប្រាសាទដ៏ធំ ដែលនៅសងខាងកាំជណ្តើរមានលម្អចម្លាក់សត្វតោរីឯនៅតាមជ្រុងនៃខឿនជាន់ទី១ និងទី២មានលម្អដោយរូបដំរីដែលមានប្រមោយសំយ៉ុងត្រង់ចុះក្រោម ហើយនៅលើដំរីមានលម្អខ្សែកទៀតផង។ យោងតាមសិលាចារឹកបញ្ជាក់ថា ប្រាសាទមេបុណ្យខាងកើតជាប្រាសាទភ្នំធ្វើអំពីឥដ្ឋរាងជើងក្អែកសម្រាប់ឧទ្ទិសដល់បុព្វការីជន ដែលមានដាក់រូបមាតាបិតាក្នុងទម្រង់ជាព្រះឥសូរ ព្រះនាងបារវតី ព្រះវិស្ណុ ព្រះព្រហ្ម និងនៅក្នុងប្រាង្គកណ្តាលដាក់លិង្គទេវរាជដែលលោក ហ្ស៊ក សេដែស អះអាងថាឈ្មោះ រាជេន្ទ្រស្វរៈ។ ស្រដៀងនឹងប្រាសាទប្រែរូបដែរ ប្រាសាទមេបុណ្យមានឈ្មោះបោះសំលេងដោយសារសិលាចារឹកជាភាសាសំស្ក្រឹតដ៏ល្អឯក និងកម្រ។ កំណាព្យចារឹកប្រាសាទមេបុណ្យខ្លីជាងប្រាសាទប្រែរូបបន្តិច និងមានល្បះស្រដៀងគ្នាច្រើនដែរ។ បច្ចុប្បន្ន ប្រាសាទមេបុណ្យកើតក្រៅពីទាក់ទាញទេសចរ អ្នកសិក្សាស្រាវជ្រាវក៏បានក្លាយជាទីសក្ការៈដែលអ្នកស្រុកនៅជុំវិញប្រាសាទមានជំនឿជាក់ថា ពូកែស័ក្តិសិទ្ធិក្នុងការរៀបចំពិធីសុំទឹកភ្លៀងជារៀងរាល់ឆ្នាំទៀតផង៕