កម្ពុជា-ថៃ នឹងពិនិត្យឡើងវិញដើម្បីអាចឲ្យភ្ញៀវទេសចបើកបរចេញចូលឆ្លងទៅឆ្លងមកដោយខ្លួនឯងដើម្បីជំរុញកំនើនភ្ញៀវទេសចរទៅវិញទៅមក។ ការបង្ហើបអំពីផែនការជំរុញវិស័យទេសចរណ៍នេះបានធ្វើឡើងនារសៀលថ្ងៃទី០២ ខែមីនា ឆ្នាំ២០២៣នេះក្នុងឱកាសដែលលោក ថោង ខុន រដ្ឋមន្ត្រីក្រសួងទេសចរណ៍អនុញ្ញាតឱ្យលោក Cherdkiat ATTHAKOR ឯកអគ្គរាជទូតថៃប្រចាំកម្ពុជាចូលជួប និងពិភាក្សាការងារ។ នៅក្នុងជំនួបនោះភាគីទាំង២បានឯកភាពគ្នារៀបចំជំរុញភ្ញៀវទេសចរទៅវិញទៅមក និងការជំរុញភ្ញៀវទេសចរពីប្រទេសទី៣ឱ្យបានទៅទស្សនានៅក្នុងប្រទេសទាំង២ ដែលធ្វើឡើងក្រោមយុទ្ធនាការ "ព្រះរាជាណាចក្រពីរគោលដៅទេសចរណ៍តែមួយ" ហើយភាគីទាំង២ក៏បានសម្រេច និងពិនិត្យឡើងវិញនូវការជំរុញឱ្យមានភ្ញៀវទេសចរ អាចបើកបរដោយខ្លួនឯងផងដែរ។

ពាក់ព័ន្ធនឹងការពិនិត្យឡើងវិញគាំទ្រឱ្យមានភ្ញៀវទេសចរ អាចបើកបរដោយខ្លួនឯងនេះលោករដ្ឋមន្ត្រី ថោង ខុន បានបញ្ជាក់បន្ថែមថា លោកនឹងស្នើសុំទៅប្រមុខរាជរដ្ឋាភិបាលដើម្បីសិក្សាធ្វើយ៉ាងណាជំរុញឱ្យមានទេសចរណ៍អាចបើកបររថយន្តពីប្រទេសថៃចូលមកកម្ពុជា និងពីកម្ពុជាទៅថៃអាចបើកបន្តទៅទស្សនាតាមតំបន់ទេសចរណ៍នានាតាមរយៈយន្តការប្រើបណ្ណព្រំដែនព្រោះកន្លងមកថៃក៏បានអនុវត្តដូចគ្នារួចហើយដែរជាមួយនឹងប្រទេសឡាវ និងមីយ៉ាន់ម៉ា។ នៅក្នុងជំនួប​នេះឯកអគ្គរាជទូតថៃប្រចាំកម្ពុជាបានឯកភាពលើសំណើរបស់កម្ពុជាក្នុងការងារជួយបណ្តុះបណ្តាលជំនាញវិជ្ជាជីវៈលើវិស័យទេសចរណ៍ផងដែរ។ ដោយឡែកទាក់ទងនឹងវិស័យកីឡាវិញលោក Cherdkiat ATTHAKOR ក៏បានថ្លែងកោតសរសើរលើការរៀបចំព្រឹត្តិការកីឡាស៊ីហ្គេមនៅកម្ពុជាឆ្នាំ២០២៣នេះ និងបានគាំទ្រនិងជូនពរកម្ពុជាធ្វើយ៉ាងណាឱ្យការរៀបចំការប្រកួតកីឡានៅកម្ពុជានេះឱ្យទទួលបានជោគជ័យខ្ពស់ផងដែរ៕