ភ្នំពេញ៖ ដំណាំស្វាយចន្ទីនៅកម្ពុជា កំពុងប្រឈមជាមួយនឹងកត្តាអាកាសធាតុជាហេតុធ្វើឱ្យចន្ទីគាំងក្តឹប ខូចផ្កា និងខូចក្តឹប នឹងអាចមានបរិមាណថយចុះទិន្នផលគ្រាប់នៅក្នុងឆ្នាំ២០២៣នេះ។ លោក អួន ស៊ីឡុត ប្រធានសមាគមស្វាយចន្ទីកម្ពុជាបានឱ្យដឹងថា កត្តាអាកាសធាតុមិនអំណោយផលគឺបណ្ដាលមកពីអាកាសធាតុត្រជាក់អូសបន្លាយ និងភ្លៀងច្រើនដោយអន្លើ (អំឡុងខែមករា-កុម្ភៈ) ព្រមទាំងមេឃអួរអាប់ខ្លាំងជាហេតុធ្វើឲ្យចន្ទីគាំងក្តឹប ខូចផ្កា ខូចក្តឹប។
លោក អួន ស៊ីឡុត បានជំរុញដល់អ្នកមានលទ្ធភាពពិសេសអ្នកមានចម្ការធំៗពុំគួរលក់គ្រាប់ចន្ទីសើមក្រោមតម្លៃ៥០០០រៀលនោះទេខណៈការធ្លាក់ថ្លៃចន្ទីសើម ក៏មិនមែនទើបកើតតែកើតមានក្នុងឆ្នាំ២០២៣នេះដែរ។
ជាមួយគ្នានេះសមាគមស្វាយចន្ទីកម្ពុជាបានទម្លាក់ការព្យាករណ៍ទិន្នផលចន្លោះពី៥០ម៉ឺនតោនទៅ៧០ម៉ឺនតោននាឆ្នាំ២០២៣ខាងមុខ។ របាយការណ៍បូកសរុបការងារកសិកម្ម រុក្ខាប្រមាញ់ និងនេសាទ (២០២១-២០២២) បានឱ្យដឹងថា នៅកម្ពុជាមានផ្ទៃដីដាំដុះដំណាំស្វាយចន្ទីសរុបចំនួន៤០៥ ៩៩១ហិកតា និងទទួលបានបរិមាណផលសរុប៤៧២ ៦៣៦ តោន៕
