ភ្នំពេញ៖ ភ្ញៀវទេសចរប្រមាណ៦០ម៉ឺននាក់ បានដើរកម្សាន្តនៅសប្ដាហ៍ចុងខែមករាខណៈខេត្តព្រះសីហនុ និងខេត្តកំពតបានក្លាយជាគោលដៅទេសចរណ៍នាំមុខ។ របាយការណ៍របស់ក្រសួងទេសចរណ៍បានឱ្យដឹងនៅព្រឹកថ្ងៃទី៣១ ខែមករានេះថា គិតចាប់ពីថ្ងៃទី២៣-២៩ ខែមករា ឆ្នាំ២០២៣ កម្ពុជាទទួលបានភ្ញៀវទេសចរ សរុប៦០៦,១៧៥នាក់ និងភ្ញៀវបរទេស៤៩,៥៩២នាក់។ ក្រសួងឱ្យដឹងបន្តថា គោលដៅទេសចរណ៍សំខាន់ៗ ដែលភ្ញៀវច្រើនទៅកម្សាន្តរួមមាន៖ ខេត្តព្រះសីហនុ១៨៤,៩២៩នាក់, កំពត ៦៥,៧៨៧នាក់, បាត់ដំបង៦១,៧៣៧នាក់, សៀមរាប៤៧,៦៧៦នាក់, កំពង់ចាម៤២,០៤០នាក់, រាជធានីភ្នំពេញ៣៩,០៧២នាក់, ប៉ៃលិន៣៣,០៦៥នាក់ និងខេត្តកែប ចំនួន៣២,៧៤៦នាក់។

យ៉ាងណាក៏ដោយរបាយការណ៍របស់ក្រសួងទេសចរណ៍បានបញ្ជាក់ថា ចំនួនភ្ញៀវទេសចរប្រមាណ៦០ម៉ឺននាក់ក្នុងសប្តាហ៍កន្លងមកនេះគឺបានមកពីចរន្តភ្ញៀវទេសចរ ដែលបានដើរកម្សាន្តនារយៈពេល២ថ្ងៃចុងក្រោយនៃពិធីបុណ្យចូលឆ្នាំចិន (ថ្ងៃចន្ទ និងអង្គារ) ខណៈដែលសម្រាប់រយៈពេល៤ថ្ងៃនៃពិធីបុណ្យចូលឆ្នាំចិននេះកម្ពុជាទទួលភ្ញៀវសរុប្រមាណ១លាននាក់។ ក្រសួងបានចាត់ទុកការកើនឡើងនៃចរន្តភ្ញៀវទេសចរក្នុងស្រុកនាដើមឆ្នាំ២០២៣នេះថា ជាសញ្ញាវិជ្ជមានជាមួយការមកដល់ជាបន្តបន្ទាប់នៃភ្ញៀវទេសចរអន្តរជាតិ៕