ភ្នំពេញ៖ អ្នកស្លាប់ដោយសារគ្រោះថ្នាក់ចរាចរណ៍ភាគច្រើនកើតមាននៅរាជធានីភ្នំពេញខណៈខេត្តកណ្ដាល និងខេត្តកំពង់ចាមស្ថិតក្នុងតួលេខខ្ពស់ផងដែរ។ នេះបើយោងតាមរបាយការណ៍ក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២២ និងលើកទិសដៅការងាឆ្នាំ២០២៣។ នៅក្នុងកិច្ចប្រជុំនាថ្ងៃទី៣០ ខែមករា ឆ្នាំ២០២៣នេះ លោកស្រី មឹន មាណវី អគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងថា ក្នុងឆ្នាំ២០២២កន្លងទៅ បញ្ហាគ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន២៩៧៦ករណី បណ្ដាលឲ្យស្លាប់ចំនួន១៧០៩នាក់ និងរងរបួសជាង៤ពាន់នាក់ ខណៈចំនួនអ្នកស្លាប់ភាគច្រើននៅរាជធានីភ្នំពេញ ខេត្តកណ្ដាល និងខេត្តកំពង់ចាម។

ចំពោះមូលហេតុបណ្ដាលឲ្យមានគ្រោះថ្នាក់ចរាចរណ៍ត្រូវបានលោកស្រី មឹន មាណវី បញ្ជាក់ថា ដោយសារការបើកបរលើសល្បឿនកំណត់មិនគោរពសិទ្ធិមិនប្រកាន់ស្ដាំ វ៉ាជែង បត់ ស្រវឹង កត្តាយានយន្ត ជាដើម។ ជាមួយគ្នានេះអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក បានលើកឡើងថា សមត្ថកិច្ចបានបញ្ជូនករណីគ្រោះថ្នាក់ចរាចរណ៍ទៅតុលាការចំនួន១០២៧ករណី និងបានដោះស្រាយចំនួន១២១ករណី កំពុងអង្កេតចំនួន៦៦៤ករណី ព្រមទាំងបញ្ជូនជនល្មើសចំនួន៣១៦នាក់ ទៅតុលាការ ៕