ក្រុមការងារអភិរក្សអណ្តើក នៃអង្គការ WCS និងរដ្ឋបាលជលផល បានរកឃើញពងអណ្តើកហ្លួងចំនួន៤សម្បុក ក្នុងនោះ នៅថ្ងៃទី១៦ ខែមករា រកឃើញ១សម្បុក និងថ្ងៃទី១៩ រកឃើញ៣សម្បុក សរុបចំនួន៥៤គ្រាប់ ​នៅលើឆ្នេរខ្សាច់សិប្បនិម្មិត ក្បែរស្រះបង្កាត់​ពូជមួយ ក្នុងមជ្ឈមណ្ឌលអភិរក្ស សត្វល្មូនខេត្តកោះកុង។

នេះបើតាមប្រភពពីអង្គការ WCS ។ អអង្គការនេះបានបញ្ជាក់ថា យោងតាមរូបភាព ដែលថតបានដោយម៉ាស៊ីនថតស្វ័យប្រវត្តិ ដែលក្រុមការងារបានដាក់នៅលើឆ្នេរខ្សាច់នោះ ​បានបង្ហាញថា​ មានអណ្តើកមេជាច្រើនក្បាល បាន​ឡើងពីស្រះបង្កាត់ពូជ ​មកកាយខ្សាច់ទម្លាក់ពង នៅវេលាចន្លោះម៉ោង៩យប់ ដល់ពាក់កណ្តាលយប់ ថ្ងៃទី១៦ និងទី១៨ ខែមករា ។

បើតាមអង្គការ WCS នេះគឺជាឆ្នាំទី៣ ហើយ ដែលអណ្តើកហ្លួងចិញ្ចឹម បានពងនៅក្នុងមជ្ឈមណ្ឌលក្នុងប្រទេសកម្ពុជា។ក្រុមការងាររំពឹងថា នឹងរកឃើញពងអណ្តើកហ្លួងនៅក្នុងមជ្ឈមណ្ឌលនេះបន្ថែមទៀត ក្នុងរដូវពងកូនឆ្នាំនេះ ​ចាប់ផ្តើមពីខែមករា​ រហូតដល់ខែមីនា ។

គួររំលឹកថា កាលពីឆ្នាំ២០២២ ក្រុមការងារ បានរកឃើញពងអណ្តើកហ្លួងនៅលើឆ្នេរខ្សាច់ដដែលនេះ ​ចំនួន៩ សម្បុក មានពងសរុប​ចំនួន៨១គ្រាប់ និង ញាស់បាន៣៣កូន។ ការបង្កាត់ពូជអណ្តើកហ្លួងនៅក្នុងមជ្ឈមណ្ឌល ​គឺជាគោលដៅអភិរក្សរបស់អង្គការ ​WCS និងរដ្ឋបាល​ជលផល សំដៅស្តារចំនួនអណ្តើកប្រភេទនេះ​ ឱ្យមានច្រើននៅក្នុងធម្មជាតិឡើងវិញ ។

បច្ចុប្បន្ន មជ្ឈមណ្ឌលអភិរក្សសត្វល្មូនខេត្តកោះកុង មានអណ្តើកហ្លួងចំនួន១៨៤ ក្បាល។ ចាប់តាំងពីឆ្នាំ២០១៥ ក្រុមការងារ បានលែងអណ្តើកហ្លួងជំទង់ ចំនួន១៤៧ក្បាល ចូលក្នុង​ទីជម្រក​ធម្មជាតិវិញ។​ អណ្តើកជំទង់ និងស្ទើរជំទង់ នៅក្នុងមជ្ឈមណ្ឌល ត្រូវបានក្រុមការងារចិញ្ចឹម​ថែទាំ​នៅក្នុងស្រះបង្កាត់ ពូជចំនួន៤ ចំណែកឯកូនអណ្តើកតូចៗ ​ត្រូវបានដាក់ចិញ្ចឹមនៅក្នុងធុងប្លាស្ទិក មុននឹងផ្ទេរចូលក្នុងស្រះ បង្កាត់ពូជ។

អណ្តើកហ្លួង មានឈ្មោះជាភាសាអង់គ្លេសថា Southern River Terrapin និងឈ្មោះវិទ្យាសាស្ត្រ ថា Batagur Affinis ។ អណ្តើកប្រភេទនេះ ត្រូវបានកត់ត្រានៅក្នុងបញ្ជីក្រហមរបស់អង្គការ​ IUC ថាជា ប្រភេទជិត​ផុតពូជបំផុត ។​

កាលពីនៅឆ្នាំ២០០៥ រាជរដ្ឋាភិបាលកម្ពុជា​ បានចេញព្រះរាជក្រឹត្យ ចាត់​ចំណាត់ថ្នាក់សត្វប្រភេទនេះ ជាសត្វល្មូនជាតិ តំណាងឱ្យព្រះរាជាណាចក្រកម្ពុជា៕ (មានជ័យ)