ភ្នំពេញ៖ នៅក្នុងពិធីជួបសំណេះសំណាល និងពិនិត្យការដ្ឋាន «មន្ទីរពេទ្យជាតិ តេជោសន្ដិភាព» នាព្រឹកថ្ងៃទី១៩ ខែមករា ឆ្នាំ២០២៣នេះ ប្រធានគណបក្សប្រជាជនកម្ពុជា និងជានាយករដ្ឋមន្រ្តីបានប្រកាសចាត់វិធានការតាមផ្លូវច្បាប់លើជនណា ដែលប្រមាថមកលើគណបក្សប្រជាជនកម្ពុជា។ សម្ដេចតេជោ ហ៊ុន សែន បានមានប្រសាសន៍លើកឡើងថា ចាប់ពីថ្ងៃនេះតទៅមិនត្រូវលើកលែងជាដាច់ខាតចំពោះអ្នកណាដែលប្រមាថមកលើគណបក្សប្រជាជនកម្ពុជា និងបានសូមឱ្យយកគំរូតាមការផ្សាយពាណិជ្ជកម្ម ដែលគេមិននិយាយអាក្រក់ពីផលិតផលអ្នកដទៃហើយលើកខ្លួនឯងនោះទេ។
ជាមួយគ្នានេះសម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានជំរុញឱ្យលោកមេធាវីគី តិច ពិនិត្យលើខ្លឹមសារនៃសេចក្ដីថ្លែងការណ៍របស់គណបក្សភ្លើងទៀន ដែលនិយាយថា គណបក្សប្រជាជនកម្ពុជាគាបសង្កត់។ សម្ដេចតេជោបានមានប្រសាសន៍លើកឡើងដែរថា ករណីសមត្ថកិច្ចឃាត់ខ្លួនលោក ថាច់ សេដ្ឋា អនុប្រធានគណបក្សភ្លើងទៀនគឺអនុវត្តតាមដីការបស់តុលាការជុំវិញករណីមិនបំពេញកាតព្វកិច្ចចំពោះឧបករណ៍អាចជួញដូរបាន (សែកស្អុយ)៕
