ក្រសួងទេសចរណ៍កំពុងបន្តចុះត្រួតពិនិត្យ និងទទួលស្គាល់គុណភាពសេវាកម្មកាណូតទេសចរណ៍កម្ពុជាដើម្បីធានាថា ការធ្វើដំណើរកម្សាន្តទេសចរណ៍តាមផ្លូវទឹកប្រកបដោយសុវត្ថិភាព និងគុណភាពស្របតាមលក្ខណៈស្តង់ដា។ បើតាមក្រសួងទេសចរណ៍ការវាយតម្លៃសុវត្ថិភាព និងគុណភាពសេវាកម្មកាណូតទេសចរណ៍កម្ពុជាមានលក្ខណៈវិនិច្ឆ័យចំនួន៣៤ និងលក្ខខណ្ឌតម្រូវចំនួន១៩ក្នុងនោះផ្តោតលើ: ទី១. សូចនាករពីបរិស្ថាន ទី២. សូចនាករពីការតុបតែងខាងក្នុង ទី៣. សូចនាករពីសុវត្ថិភាព ទី៤. សូចនាករពីសំភារៈប្រើប្រាស់ និងទី៥. សូចនាករពីបុគ្គលិក និងការបម្រើសេវាកម្មទេសចរណ៍។
គួររំលឹកថា បច្ចុប្បន្នក្រសួងទេសចរណ៍កំពុងទទួលការដាក់ពាក្យស្នើសុំជាបន្តបន្ទាប់ពីអាជីវកម្មកាណូតទេសចរណ៍ និងកំពុងបន្តចុះត្រួតពិនិត្យសុវត្ថិភាព-គុណភាពសេវាកម្ម មុនឈានដល់ការចេញវិញ្ញាបនបត្របញ្ជាក់គុណភាពសេវាកម្ម ដើម្បីអនុញ្ញាតឱ្យអាជីវកម្មអាចប្រើប្រាស់សម្រាប់ចុះកិច្ចសន្យាជាមួយក្រុមហ៊ុនជាដៃគូរ។ ជាមួយគ្នានោះ ក្រសួងទេសចរណ៍បានលើកទឹកចិត្តអាជីវកម្មកាណូតទេសចរណ៍ ដើម្បីមកដាក់ពាក្យស្នើសុំទទួលស្គាល់គុណភាពសេវាកម្មដោយឥតគិតថ្លៃនៅទីស្តីការក្រសួងទេសចរណ៍៕
