ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានណែនាំដល់អាជ្ញាធររាជធានីខេត្ត ត្រូវធ្វើការដោះស្រាយពាក្យបណ្តឹងទាំងអស់ឱ្យបានច្បាស់លាស់ និងត្រឹមត្រូវហើយមិនត្រូវទុកចោលករណីណាមួយនោះទេ។ ការណែនាំនេះបានធ្វើឡើងក្នុងពិធីបើកវេទិកាស្ដីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល (លើកទី៥) កាលពីថ្ងៃទី១០ ខែមករា ឆ្នាំ២០២៣។ នៅក្នុងពិធីនេះសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានមានប្រសាសន៍លើកឡើងថា ពាក្យបណ្ដឹងបានថយចុះខណៈពីមុនមានជាមធ្យមចំនួន១០បណ្ដឹងក្នុង១ថ្ងៃ។
សម្ដេចក្រឡាហោមបានែនាំដល់អភិបាលរាជធានី ខេត្ត និងអ្នកពាក់ព័ន្ធត្រូវដោះស្រាយបញ្ហាពាក្យបណ្ដឹងនានាឱ្យបានច្បាស់លាស់ និងមិនត្រូវធ្វើលំៗ ស្រាលៗ ដោយផ្សំគំនិតនោះឡើយ ហើយក្នុងករណីមានការបិទបាំងគឺមានន័យថា ជាការគាំទ្រនូវអំពើទុច្ចរិត។ សូមបញ្ជាក់ដែរថា នៅក្នុងពិធីដដែលនេះសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានណែនាំឱ្យរដ្ឋបាលរាជធានី ខេត្ត ត្រូវចាត់វិធានការបញ្ឈប់ជាបន្ទាន់នូវសកម្មភាពរបស់សមាគម និងអង្គការមិនមែនរដ្ឋាភិបាល មួយចំនួនដែលធ្វើសកម្មភាពបោកប្រាស់ប្រជាពលរដ្ឋ។
សម្ដេចក្រឡាហោម ស ខេង មានប្រសាសន៍លើកឡើងថា រដ្ឋបាលរាជធានី ខេត្ត ត្រូវចាត់វិធានការបញ្ឈប់ជាបន្ទាន់នូវសកម្មភាពរបស់សមាគម និងអង្គការមិនមែនរដ្ឋាភិបាលមួយចំនួនតូចដែលធ្វើសកម្មភាពបោកប្រាស់អូសទាញប្រជាពលរដ្ឋតាមរយៈការចូលជាសមាជិក និងតម្រូវឱ្យបង់ប្រាក់ចូលមូលនិធិរបស់សមាគម និងអង្គការមិនមែនរដ្ឋាភិបាលក្នុងគោលបំណងដើម្បីបម្រើផលប្រយោជន៍ផ្ទាល់ខ្លួន ដែលជាសកម្មភាពប្រព្រឹត្តផ្ទុយនឹងបទប្បញ្ញត្តិនៃច្បាប់ និងលិខិតបទដ្ឋានគតិយុត្តជាធរមាន៕
