រដ្ឋមន្ត្រីក្រសួងវប្បធម៌ និងវិចិត្រសិល្បៈបានស្នើឲ្យអគ្គស្នងការនគរបាលជាតិនាយឧត្តមសេនីយ៍ នេត សាវឿន ចាត់វិធានការទប់ស្កាត់កការផ្សព្វផ្សាយបទចម្រៀងអមដោយរូបភាពក្រោមចំណងជើង "ឈាមបាតុករ" ដោយសំអាងថា បទចម្រៀងនេះមានខ្លឹមសារ អុជអាល ញុះញង់ អាចនឹងបង្កអសន្តិសុខសណ្តាប់ធ្នាប់ដល់សង្គម។ នេះបើយោងតាមរដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រីបណ្ឌិត ភឿង សកុណា ផ្ផ្ញើរជូន នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ដែលទើបទទួលបាននៅថ្ងៃទី០៧ ខែមករា នេះ។
លោកស្រីលើកឡើងថា ក្រសួងវប្បធម៌ និងវិចិត្រសិល្បៈបានពិនិត្យឃើញក្នុងពេលបច្ចុប្បន្ននេះមានទំព័របណ្តាញប្រព័ន្ធព័ត៌មានសង្គមមួយចំនួនបានយកបទចម្រៀងខាងលើរបស់អ្នកនិពន្ធទំនុកច្រៀង និងអ្នកច្រៀងឈ្មោះ គា សុគន្ធ ដែលធ្លាប់ត្រូវបានក្រសួងមហាផ្ទៃចាត់វិធានការបិទ និងផ្ដន្ទាទោសម្តងរួចហើយមកផ្សព្វផ្សាយជាថ្មីឡើងវិញ។
ដូច្នេះ ដើម្បីទប់ស្កាត់នូវភាពមិនប្រក្រតីដែលអាចនឹងកើតមានឡើងជាយថាហេតុតាមរយៈបទចម្រៀងដែលមានខ្លឹមសារ អុជអាល ញុះញង់នេះ លោកស្រីបានស្នើឲ្យនាយឧត្តមសេនីយ៍សន្តិបបណ្ឌិតពិនិត្យននិងចាត់វិធានការតាមនីតិវិធីច្បាប់ដែលមានជាធរមាន។ សូមបញ្ជាក់ថា បទចម្រៀងនេះក្រៅពីផ្សព្វផ្សាយនៅតាមបណ្តាញសង្គមហ្វេសប៊ុកផ្សេងៗ អង្គការលីកាដូក៏បានលើកយកទៅបង្ហោះផងដែរ។ ដោយប្រើចំណងជើងថា "ឈាមបាតុករ៖ ៩ឆ្នាំ ពុំទាន់មានយុត្តិធម៌សម្រាប់កម្មករ ដែលរងការបាញ់ប្រហារនៅផ្លូវវេងស្រេង"៕
