បច្ចុប្បន្នក្រសួងទេសចរណ៍បានចុះធ្វើការវាយតម្លៃ និងផ្តល់វិញ្ញាបនបត្រទទួលស្គាល់ជាបន្តបន្ទាប់ដល់អាជីវកម្មទេសចរណ៍ដែលមានលក្ខណៈសម្បត្តិគ្រប់គ្រាន់សម្រាប់ទទួលទេសចរចិនក្នុងឆ្នាំ២០២៣នេះ។ រដ្ឋាភិបាលចិនបានចាប់ផ្តើមបើកប្រទេសឡើងវិញហើយកម្ពុជា គឺជាគោលដៅនៃការធ្វើដំណើរចេញក្រៅប្រទេសរបស់ ប្រជាជនចិនទាំងផ្នែកធុរកិច្ច និងទេសចរណ៍នេះបើតាមលោក វ៉ាង វិ​ន​ធៀន (H.E. Mr. Wang Wentian) ឯកអគ្គរដ្ឋទូត​នៃ​សាធារណរដ្ឋ​ប្រជាមានិត​ចិន​ប្រចាំ​ព្រះរាជាណាចក្រ​កម្ពុជា ។ ដោយសារតែបញ្ហានេះក្រសួងទេសចរណ៍ប្រកាសបន្តទទួលស្គាល់គុណភាពសេវាកម្មទទួលទេសចរចិន (China Ready Accreditation) ដល់អាជីកម្មទេសចរណ៍ក្រោយគណៈកម្មការសុខភាពចិនបានប្រកាសនឹងបញ្ចប់ការតម្រូវឱ្យធ្វើចត្តាទ្បីស័កសម្រាប់អ្នកដំណើរចូលក្នុងប្រទេសដោយចាប់អនុវត្តចាប់ពីថ្ងៃទី០៨ ខែមករា ឆ្នាំ២០២៣ខាងមុខនេះតទៅ ។

ក្នុងនោះមានការលុបចោលការធ្វើចត្តាឡីស័ករយៈពេល៥ថ្ងៃនៅឯកន្លែងត្រួតពិនិត្យដោយរដ្ឋាភិបាល និងការបន្តស្នាក់នៅដាច់ដោយឡែកចំនួន៣ថ្ងៃបន្ថែមទៀតនៅផ្ទះ ដោយគ្រាន់តែត្រូវឆ្លងកាត់ការធ្វើតេស្ត PCR រយៈពេល៤៨ម៉ោងមុនពេលចេញដំណើរប៉ុណ្ណោះ  ដូច្នេះក្រសួងទេសចរណ៍កំពុងរៀបចំខ្លួនទ្បើងវិញដើម្បីពង្រឹងគុណភាពទទួលទេសចរចិនតាមរយៈការដាក់ចេញនូវយន្តការវាយតម្លៃទទួលស្គាល់គុណភាពទទួលទេសចរចិន (China Ready Accreditation) ដោយចុះធ្វើការវាយតម្លៃ និងផ្តល់វិញ្ញាបនបត្រទទួលស្គាល់ជាបន្តបន្ទាប់ដល់អាជីវកម្មទេសចរណ៍ដែលមានលក្ខណៈសម្បត្តិគ្រប់គ្រាន់សម្រាប់ទទួលទេសចរចិន។ ជាមួយគ្នានោះក្រសួងទេសចរណ៍បានបន្តលើកទឹកចិត្តអាជីវកម្មទេសចរណ៍ដែលទទួលទេសចរចិនមកដាក់ពាក្យស្នើសុំការទទួលស្គាល់គុណភាពសេវាកម្មទទួលទេសចរចិន (China Ready Accreditation) ដោយឥតគិតថ្លៃនៅទីស្តីការក្រសួងទេសចរណ៍។

បើតាមក្រសួងទេសចរណ៍កន្លងមកក្រសួងបានទទួលស្គាល់អាជីវកម្មទេសចរណ៍មួយចំនួនរួចហើយដូចជាណានជីង អ៊ិនធើណេសិនណល ហូលីដេ ធួរគ្រុប - Nanjing International Holiday Tour Group Co.,Ltd (រាជធានីភ្នំពេញ) ឌីអិម អ៊ិនធើណេសិនណលត្រាវែល - DM International Travel Co., Ltd (រាជធានីភ្នំពេញ) ជាដើម៕