ដោយសាតែស្ថានភាពអាកាសធាតុមិនអំណោយផលនៅខែមករានេះក្រសួងទេសចរណ៍បានប្រាប់ឲ្យមន្ទីរទេសចរណ៍ រាជធានី-ខេត្តទាំងអស់ធ្វើការផ្សព្វផ្សាយ និងណែនាំទៅដល់ម្ចាស់មូលដ្ឋានអាជីវកម្មសេវាកម្មទេសចរណ៍ ប្រតិបត្តិករទេសចរ និងភ្ញៀវ ទេសចរទាំងអស់ ឱ្យបង្កើនការប្រុងប្រយ័ត្ន និងយកចិត្តទុកដាក់ខ្ពស់ដើម្បីជៀសវាងនូវគ្រោះថ្នាក់ដែលអាចកើតឡើងជាយថាហេតុ។ សេចក្តីជូនដំណឹងរបស់ក្រសួងទេសចរណ៍ ដែលទើបទទួលបាននៅថ្ងៃទី០៥ ខែមករា ឆ្នាំ២០២៣នេះ បានឲ្យដឹងថា យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ព្រះរាជាណាចក្រកម្ពុជា នឹងទទួលរងឥទ្ឋិពលមួយចំនួនដូចជា៖ ពីថ្ងៃទី០៤ ដល់០៧ ខែមករា ទទួលរងឥទ្ធិពលពីជ្រលងសម្ពាធទាបសកម្មពីភាគខាងក្រោមនៃសមុទ្រចិនខាងត្បូង។ ពីថ្ងៃទី០៨ ដល់១០ ខែមករា ទទួលរងឥទ្ឋិពលពីទ្រនុងសម្ពាធខ្ពស់ (ចិន និងខ្យល់មូសុងឦសាន) ក្នុងកម្រិតពីខ្សោយទៅមធ្យម។

ដែលស្ថានភាពបែបនេះ នឹងធ្វើឱ្យតំបន់ទំនាបកណ្ដាល តំបន់ខ្ពង់រាប និងតំបន់មាត់សមុទ្រ ចាប់ពីថ្ងៃទី០៥ដល់០៧ ខែមករា នឹងអាចមានភ្លៀងធ្លាក់ក្នុងកម្រិតពីខ្សោយទៅមធ្យមដោយអន្លើ ហើយក៏នឹងអាចមានភ្លៀងខ្យល់បក់ពីបង្គួរទៅខ្លាំងឯនៅលើផ្ទៃសមុទ្រក៏នឹងកើតមានរលកសមុទ្រពីមធ្យមទៅបង្ហូរផងដែរ។ ដូច្នេះ “ដើម្បីធានាសន្តិសុខ និងសុវត្ថិភាពដល់ភ្ញៀវទេសចរជាតិ និងអន្តរជាតិជាពិសេស រាជធានីខេត្តដែលទទួលរងឥទ្ធិពលខាងលើនេះ ក្រសួងទេសចរណ៍ ធ្វើសេចក្ដីជូនដំណឹងដល់ឯកឧត្តម លោក-លោកស្រីប្រធានមន្ទីរទេសចរណ៍ រាជធានី-ខេត្ត ធ្វើការផ្សព្វផ្សាយនិងណែនាំដល់ម្ចាស់មូលដ្ឋានអាជីវកម្ម សេវាកម្មទេសចរណ៍ ប្រតិបត្តិករទេសចរ និងភ្ញៀវ ទេសចរទាំងអស់ឱ្យបង្កើនការប្រុងប្រយ័ត្ន និងយកចិត្តទុកដាក់ខ្ពស់ដើម្បីជៀសវាងនូវគ្រោះថ្នាក់ដែលអាចកើតឡើងជាយថាហេតុ”។ ក្រសួងទេសចរណ៍បានប្រាប់ឲ្យស្ថាប័នជំនាញទាំងនោះត្រូវយកចិត្តទុកដាក់អនុវត្តប្រកបដោយស្មារតីទទួលខុសត្រូវខ្ពស់ចាប់ពីថ្ងៃជូនដំណឹងនេះតទៅ។

គួររំលឹកថា នៅរយៈពេល១១ខែ ក្នុងឆ្នាំ២០២២ កម្ពុជាទទួលបានទេសចរអន្តរជាតិប្រមាណ១លាន៩សែននាក់កើនឡើងជាង១០០០ភាគរយ បើធៀបនឹងរយៈពេលដូចគ្នាក្នុងឆ្នាំ២០២១។ ក្នុងនោះភ្ញៀវទេសចរដែលបានចូលមកកម្សាន្តនៅកម្ពុជាច្រើនជាងគេគឺភ្ញៀវទេសចរមកពីប្រទេសថៃ ដែលមានចំនួនជាង ៧២ម៉ឺននាក់បន្ទាប់មកគឺភ្ញៀវទេសចរវៀតណាម មានជាង៤០ម៉ឺននាក់ ខណៈភ្ញៀវទេសចរចិន មានប្រមាណ៩ម៉ឺននាក់។ ដោយឡែក នៅឆ្នាំ២០២៣ កម្ពុជារំពឹងថា អាចទទួលបានភ្ញៀវទេសចរអន្តរជាតិច្រើនជាង៣លាននាក់ផងដែរ។ ការកើនឡើងនៃចំនួនភ្ញៀវទេសចរណ៏នេះបន្ទាប់ពីរាជរដ្ឋាភិបាលកម្ពុជាទប់ស្កាត់បាននូវការរីករាលនៃជម្ងឺកូវីដ១៩ និងបើកប្រទេសឡើងវិញគ្រប់វិស័យ និងបើកទទួលភ្ញៀវទេសចរជាដើម ជាពិសេសការរៀបចំបុណ្យសមុទ្រ និងសន្និបាទឆ្នេរសមុទ្រដ៏ស្រស់ស្អាតលើពិភពលោក ដែលរៀបចំធ្វើនៅខេត្តព្រះសីហនុកាលពីថ្មីៗនេះ៕