ភ្នំពេញ៖ មនុស្សសរុបចំនួន១៥នាក់បានស្លាប់ និងរងរបួសធ្ងន់-ស្រាលដោយសារករណីគ្រោះថ្នាក់ចរាចរណ៍ផ្លូវគោកទូទាំងប្រទេសថ្ងៃទី៣ ខែមករា ឆ្នាំ២០២៣។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ។ យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស បានឱ្យដឹងថា គ្រោះថ្នាក់ចរាចរណ៍ផ្លូវគោកទូទាំងប្រទេសកាលពីថ្ងៃទី៣ ខែមករា បានបណ្តាលឲ្យមនុស្សស្លាប់៦នាក់ និងរបួសធ្ងន់ចំនួន៧នាក់ព្រមទាំងរបួសស្រាលចំនួន២នាក់។

យោងតាមទិន្នន័យគ្រោះថ្នាក់ចរាចរណ៍ផ្លូវគោកបានបញ្ជាក់ថា គ្រោះថ្នាក់នេះកើតឡើងដោយសារការប៉ះទង្គិចគ្នាចំនួន១១លើក។ ថ្នាក់ដឹកនាំក្រសួងមហាផ្ទៃធ្លាប់វាយតម្លៃថា ករណីគ្រោះថ្នាក់ចរាចរណ៍នៅកម្ពុជាមានការកើនឡើងដែលជាមធ្យមក្នុងមួយថ្ងៃមានអ្នកស្លាប់ចំនួន៥នាក់ និងរបួសប្រមាណ១៣នាក់បើធៀបឆ្នាំ២០២១ជាមធ្យមក្នុងមួយថ្ងៃមានអ្នកស្លាប់ចំនួន៤នាក់ និងរបួសប្រមាណ១០នាក់ខណៈភាគច្រើនជាអ្នកជិះម៉ូតូនិងមិនបានពាក់មួកការពារសុវត្ថិភាព៕