ភ្នំពេញ៖ ផលនេសាទដាយត្រក្នុងរាជធានីភ្នំពេញ និងខេត្តកណ្តាលចាប់ពីថ្ងៃទី២៩ ខែធ្នូ ឆ្នាំ២០២២ ដល់ថ្ងៃទី២ ខែមករា ឆ្នាំ២០២៣ សម្រេចបានបរិមាណ១ ៤៨១តោន ខណៈបរិមាណនេះមានការកើនឡើងប្រមាណ៤០ភាគរយ បើធៀបទៅនឹងផលនេសាទដោយតីនារដូវនេសាទឆ្នាំ២០២១-២០២២ ដែលទទួលបានចំនួន៨៩០តោន។ តាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រភេទត្រីដែលនេសាទបានពីដាយត្រីក្នុងរដូវនេសាទនេះរួមមាន៖ ត្រីរៀល៤៥% ស្លឹកឫស្សី៣០% ខ្នងវែង ៥% ត្រីកហ្វ្រិក៣% ត្រីច្រកែង២% ត្រីឃ្វាត៥% និងត្រីចម្រុះ១០%។
ក្រសួងបានលើកឡើងថា កំណើនត្រីដែលចាប់បាននៅក្នុងគន្លងដាយនេះឆ្លុះបញ្ចាំងឱ្យឃើញថា បរិមាណត្រីទឹកសាបនៅក្នុងធម្មជាតិមានការកើនឡើងជាងមុន ដែលជាលទ្ធផលនៃការទប់ស្កាត់ប្រកបដោយប្រសិទ្ធភាពនូវបទល្មើសក្នុងបឹងទន្លេសាបពីសំណាក់មន្ត្រីជលផល និងកងកម្លាំងមានសមត្ថកិច្ចចម្រុះទាំងអស់កាលពីរដូវត្រីពងក្នុងអំឡុង ឆ្នាំ២០២២កន្លងទៅ។ ជាមួយគ្នានេះ ក្រសួងប្រកាសលើកទឹកចិត្តដល់សហគមន៍នេសាទទាំងអស់ឱ្យគោរពច្បាប់នេសាទដើម្បីរក្សាធនធានជលផលឱ្យបានយូរអង្វែង និងព្រមានចំពោះអ្នកប្រព្រឹត្តល្មើសត្រូវប្រឈមនឹងទោសទណ្ឌជាធរមាន៕
