ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា នឹងអញ្ចើញបើកការដ្ឋានស្ថាបនាពង្រីកផ្លូវជាតិលេខ៧ចាប់ពីរង្វង់មូលស្គន់ ស្រុកជើងព្រៃ ដល់រង្វង់មូល ស្ពានគីហ្សូណា ក្រុងកំពង់ចាម នៅសប្ដាហ៍ក្រោយ។ រដ្ឋបាលខេត្តកំពង់ចាមបានឱ្យដឹងនៅព្រឹកថ្ងៃទី៣ ខែមករា ឆ្នាំ២០២៣នេះថា បើកការដ្ឋានស្ថាបនាពង្រីកផ្លូវជាតិលេខ៧ នឹងធ្វើឡើងនៅព្រឹកថ្ងៃទី៩ ខែមករា ក្រោមវត្តមានសម្តេចតេជោ ហ៊ុន សែន នាយករដ្ឋមន្រ្តីកម្ពុជាត្រង់ចំណុចភូមិតាំងគោក ឃុំល្វា ស្រុកជើងព្រៃ ( គីឡូម៉ែត្រលេខ៨៦ )។
រដ្ឋបាលខេត្តកំពង់ចាមក៏បានអំពាវនាវដល់អ្នកបើកបរគ្រប់ប្រភេទបញ្ចៀសការធ្វើចរាចរណ៍នៅគោលដៅខាងលើដើម្បីឱ្យដំណើរការបើកការដ្ឋានប្រព្រឹត្តទៅដោយរលូន និងដើម្បីបញ្ចៀសការកកស្ទះព្រមទាំងរក្សាបានរបៀបរៀបរយក្នុងពិធី។
លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានឱ្យដឹងថា គម្រោងពង្រីកផ្លូវជាតិលេខ៧មានប្រវែងសរុប៤៥,៤៨៩ គីឡូម៉ែត្រ។ ផ្លូវជាតិនេះនឹងពង្រីកជា បួនគន្លងចាប់ពីរង្វង់មូលស្គន់ ដល់រង្វង់មូលស្ពានគីហ្ស៊ូណា ខេត្តកំពង់ចាម គឺក្រោមឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិនដោយប្រើប្រាស់ថវិកាប្រមាណ១១៥លានដុល្លារ និងគ្រោងចំណាយពេលសាងសង់ប្រមាណ៣៦ខែដោយអនុវត្តការងារសាងសង់ដោយក្រុមហ៊ុនសាជីវកម្មស្ពាន និងថ្នល់ចិន៕
