ភ្នំពេញ៖ កម្ពុជាបន្តទទួលរងនូវឥទ្ធិពលពីជ្រលងសម្ពាធទាបសកម្មពីភាគខាងក្រោមនៃសមុទ្រចិនខាងត្បូង និងឥទ្ធិពលពីទ្រនុងសម្ពាធខ្ពស់ (ចិន) និងខ្យល់មូសុងឦសានក្នុងកម្រិតពីខ្សោយទៅមធ្យមចាប់ពីថ្ងៃទី៤ដល់ថ្ងៃទី១០ ខែមករា ឆ្នាំ២០២៣ ដោយធ្វើឱ្យតំបន់ខ្លះមានភ្លៀងធ្លាក់ និងខ្យល់បក់ខ្លាំង។ ក្រសួងធនធានទឹក និងឧតុនិយមបានឱ្យដឹងនៅព្រឹកថ្ងៃទី៣ ខែមករា ឆ្នាំ២០២២នេះថា ស្ថានភាពបែបនេះនឹងធ្វើឲ្យតំបន់ទំនាបកណ្តាលមានសីតុណ្ហភាពអប្បបរមាពី២១-២៤អង្សាសេនិងសីតុណ្ហភាពអតិបរមាមានពី ២៨-៣០អង្សាសេ ហើយនៅថ្ងៃទី៥ដល់ថ្ងៃទី៧ ខែមករា នឹងអាចមានភ្លៀងធ្លាក់នៅក្នុងកម្រិតខ្សោយទៅមធ្យមដោយអន្លើ ។
ក្រសួងឱ្យដឹងបន្តថា នៅតំបន់ខ្ពង់រាបមានសីតុណ្ហភាពអប្បបរមាមានពី១៨-២១អង្សាសេ និងសីតុណ្ហភាពអតិបរមាមានពី២៨-៣០អង្សាសេ ហើយនៅថ្ងៃទី៥ដល់ថ្ងៃទី៧ ខែមករា នឹងអាចមានភ្លៀងធ្លាក់នៅក្នុងកម្រិតខ្សោយទៅមធ្យមដោយអន្លើ ។ ជាមួយគ្នានេះដែរ ក្រសួងធនធានទឹក និងឧតុនិយមបានបញ្ជាក់ថា នៅតំបន់មាត់សមុទ្រ សីតុណ្ហភាពអប្បបរមាមានពី២២-២៤ក្រសួងធនធានទឹកនិងឧតុនិយម និងសីតុណ្ហភាពអតិបរមាមានពី២៨-៣០អង្សាសេ ហើយនៅថ្ងៃទី៥ដល់ថ្ងៃទី៧ ខែមករា នឹងអាចមានភ្លៀងធ្លាក់នៅក្នុងកម្រិតខ្សោយទៅមធ្យមដោយអន្លើ នឹងអាចមានភ្លៀងខ្យល់បក់ពីបង្គួរទៅខ្លាំង ។ ឯនៅលើផ្ទៃសមុទ្រក៏នឹងកើតមានរលកសមុទ្រពីមធ្យមទៅបង្គួរផងដែរ៕
