ភ្នំពេញ៖ មន្ត្រីនគរបាលម្នាក់បានស្លាប់នៅក្នុងហេតុការណ៍ផ្ទុះអាវុធជាច្រើនគ្រាប់បន្ទាប់សមត្ថកិច្ចបានឡោមព័ទ្ធរថយន្តរបស់ជនសង្ស័យមួយក្រុមកាលពីវេលាម៉ោង ១៩:៣០នាទីយប់ ថ្ងៃទី២៨ ខែធ្នូ ឆ្នាំ២០២២ ចំណុចស្តុបផ្លូវ៦០ម៉ែត្រ កែង៥០ម៉ែត្រ ស្ថិតក្នុងខណ្ឌមានជ័យ រាជធានីភ្នំពេញ។

នគរបាលបានឱ្យដឹងថា ករណីនេះគឺសមត្ថកិច្ចមន្ទីរប្រឆាំងគ្រឿងញៀនបានឡើងប្រកាសតាមវិទ្យុទាក់ទងឱ្យកម្លាំងសមត្ថកិច្ចពង្រាយកម្លាំងជួយតាមរថយន្តចាប់ឃាត់រថយន្តក្រុមជនសង្ស័យមួយក្រុមពាក់ស្លាកលេខ0365បន្ទាប់ពីក្រុមនោះមានការផ្ទុះអាវុធជាមួយសមត្ថកិច្ចពេលចុះបង្ក្រាបគ្រឿងញៀន។ ចំណែកមន្រ្តីនគរបាល ដែលបានបាត់បង់ជីវិតមានឈ្មោះ ម៉ិច ឆាយភីវ័យ ឋានន្តរសក្ដិវរសេនីយ៍ត្រី ឋានៈនាយរងការិយាល័យផ្សព្វផ្សាយអប់រំ។ នគរបាលបានឱ្យដឹងដែរថា នៅក្នុងករណីនេះសមត្ថកិច្ចបានឃាត់ខ្លួនមនុស្សចំនួន៣នាក់យកទៅសាកសួរបន្តតាមនីតិវិធី៕