ភ្នំពេញ៖ មាត្រាច្បាប់ចាស់ចំនួន៤៨មាត្រាស្ដីពីចរាចរណ៍ផ្លូវគោកត្រូវបានតាក់តែងនិងកែសម្រួលខ្លឹមសារព្រមទាំងបន្ថែមមាត្រាថ្មីៗមួយចំនួនទៀតខណៈថ្នាក់ដឹកនាំអន្តរក្រសួងរំពឹងថា សេចក្ដីព្រាងច្បាប់ថ្មីនឹងត្រូវបានបញ្ជូនទៅគណៈរដ្ឋមន្រ្តីនាដំណាច់ឆ្នាំ២០២២នេះ។ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានមានប្រសាសន៍ក្នុងកិច្ចប្រជុំឆ្លងសេចក្ដីព្រាងច្បាប់ស្ដីពីចរាចរណ៍ផ្លូវគោក(ថ្មី)នាព្រឹកថ្ងៃទី២៨ ខែធ្នូ ឆ្នាំ២០២២នេះថា សេចក្ដីព្រាងច្បាប់ស្ដីពីចរាចរណ៍ផ្លូវគោក (ថ្មី) នេះមានភាពគ្រប់ជ្រុងជ្រោយជាងច្បាប់ចាស់កន្លងទៅ។
សម្ដេច ស ខេង សង្ឃឹមថា សេចក្ដីព្រាងច្បាប់នេះ នឹងត្រូវបានបញ្ជូនទៅគណៈរដ្ឋមន្រ្តីនាដំណាច់ឆ្នាំ២០២២នេះហើយថា ច្បាប់នេះនឹងបន្តបញ្ជូនទៅដល់ដៃស្ថាប័នសភានាត្រីមាសទី១ ឆ្នាំ២០២៣ផងដែរ។ លោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូនបានមានប្រសាសន៍ក្នុងកិច្ចប្រជុំនេះថា សេចក្ដីព្រាងច្បាប់ថ្មីនេះក៏មានការបន្ថែម និងកំណត់នូវប្រភេទបទល្មើសចរាចរណ៍ផ្លូវគោកផងដែរ។ ក្នុងរបាយការណ៍ពីក្រសួងមហាផ្ទៃបានឱ្យដឹងថា សេចក្ដីព្រាងច្បាប់ថ្មីនេះបានតាក់តែងឡើងដោយកែសម្រួលខ្លឹមសារមាត្រាច្បាប់ចាស់ចំនួន៤៨មាត្រា និងបន្ថែមមាត្រាថ្មីៗមួយចំនួនទៀតដើម្បីឱ្យស្របតាមការអភិវឌ្ឍរបស់កម្ពុជា៕
