ភ្នំពេញ៖ ក្រសួងវប្បធម៌ និងវិចិត្រសិល្បៈបានប្រកាសថា ក្រសួងនឹងសហការជាមួយអ្នកពាក់ព័ន្ធដើម្បីមានវិធានការច្បាប់លើទីតាំងដែលមានការវាយកម្ទេចចោលកុដិបុរាណ ចំនួន៣នៅក្នុងវត្តឧណ្ណាលោម។ នៅក្នុងសេចក្ដីជូនដំណឹងមួយរបស់ក្រសួងវប្បធម៌ និងវិចិត្រសិល្បៈបានឱ្យដឹងនៅព្រឹកថ្ងៃទី២១ ខែធ្នូ ឆ្នាំ២០២២នេះថា ក្រសួងវប្បធម៌ និងវិចិត្រសិល្បៈ និងសហការជិតស្និទ្ធជាមួយអាជ្ញាធរដែនដី និងស្ថាប័នពាក់ព័ន្ធដើម្បីធ្វើការស៊ើបអង្កេត និងដោះស្រាយតាមវិធានការច្បាប់ដោយរក្សាទីតាំងនោះពុំឱ្យមានការសាងសង់សំណង់អ្វីរហូតដល់នីតិវិធីនានា ដែលមានជាធរមានត្រូវបានដោះស្រាយបញ្ចប់រួចរាល់។

សូមរំលឹកថា កាលពីថ្ងៃទី១២ ខែធ្នូ ឆ្នាំ២០២២ កន្លងមកនេះមានករណីវាយកម្ទេចកុដិបុរាណរហូតដល់បាត់បង់រូបភាពដើមចំនួន៣នៅក្នុងវត្តឧណ្ណាលោម និងបង្កឱ្យមានប្រតិកម្មយ៉ាងខ្លាំងខណៈកុដិទាំងនេះត្រូវបានកសាងនាកំឡុងឆ្នាំ១៩៣០ និងត្រូវបានចុះក្នុងបញ្ជីសម្បត្តិបេតិកភណ្ឌវប្បធម៌ជាតិនៃមន្ទីរវប្បធម៌និងវិចិត្រសិល្បៈរាជធានីភ្នំពេញ កាលពីឆ្នាំ២០១៧។ ជុំវិញករណីនេះមន្ត្រីសង្ឃរាជធានីភ្នំពេញធ្លាប់ប្រាប់អ្នកសារព័ត៌មានថា សម្ដេចព្រះមហាសង្ឃរាជ ទេព វង្ស បានអនុញ្ញាត ឱ្យមានការុះរើដើម្បីរៀបចំកសាងព្រះមហាចេតិយសម្រាប់សម្ដេចព្រះមហាសង្ឃរាជ៕