ជីផាត ស្ថិតនៅឃុំជីផាត ស្រុកថ្មបាំង ខេត្តកោះកុង ក្នុងតំបន់ឧទ្យានជាតិជួរភ្នំក្រវាញ ប៉ែកនិរតីនៃប្រទេសកម្ពុជា ហើយដើម្បីអាចទៅទស្សនាសហគមន៍អេកូទេសចរណ៍ជីផាត យើងអាចធ្វើដំណើរចេញពីស្ពានអណ្ដូងទឹក ឆ្ពោះត្រង់តាមផ្លូវលំ ចម្ងាយជាង១៧គីឡូម៉ែត្រដោយមធ្យោបាយផ្ទាល់ខ្លួន ឬតាមរយៈទូកសហគមន៍ ជិះកាត់តាមពាមសមុទ្រ ដែលមានទេសភាពយ៉ាងស្រស់ត្រកាល។ តំបន់អេកូទេសចរណ៍ជីផាតពោរពេញដោយសក្តានុពលទេសចរណ៍ធម្មជាតិជាច្រើនកន្លែងដូចជាទឹកធ្លាក់អូរម្លូ ទឹកធ្លាក់ឆាយខ្ពស់ ទឹកធ្លាក់ឆាយជ្រៃ ទឹកធ្លាក់អូរទឹកវេត តំបន់ពាង និងម្ឈូសបូរាណ និងល្អាងប្រចៀវ ដើរព្រៃ និងបោះតង់ក្នុងព្រៃជាដើម។ ភ្ញៀវទេសចរក៏អាចជិះទូកកាយាក់ មើលទេសភាពដងព្រែកដ៏ស្រស់ត្រកាលបានផងដែរ។
អ្វីដែលកាន់តែពិសេស គឺសហគមន៍ទេសចរបានរៀបចំជាផ្ទះស្នាក់ និងបឹងកាឡូដែលប្រកបដោយសុវត្ថិភាពជូនភ្ញៀវទេសចរផងដែរ។ ចំពោះម្ហូបទៀតសោតក៏សហគមន៍មានចុងភៅចម្អិនជូនដែរ។ ទឹកធ្លាក់ចំនួន៦កន្លែងនៅតំបន់ជីផាតរួមមាន៖
១. ទឹកធ្លាក់ឆាយខ្ពស់
"ទឹកធ្លាក់ឆាយខ្ពស់" ជារមណីយដ្ឋានទឹកធ្លាក់ដ៏ស្រស់ស្អាតមួយកន្លែងក្នុងចំណោមតំបន់អេកូទេសចរណ៍ដ៏ល្អឯកជាច្រើនទៀតនៅតំបន់អារ៉ែង ដែលកំពុងបង្អួតខ្លួនយ៉ាងស្រស់បំព្រងនៅកណ្ដាលព្រៃភ្នំ។ ទឹកធ្លាក់ឆាយខ្ពស់នេះ មានប្រភពចេញពីជួរភ្នំក្រវាញភាគខាងត្បូង ដោយហូរកាត់ព្រៃភ្នំរាប់រយគីឡូម៉ែត្រទើបមកដល់ទីនេះរួចហូរធ្លាក់ទៅដៃសមុទ្រ។ ទឹកធ្លាក់ឆាយខ្ពស់មានទីតាំងស្ថិតនៅ ភូមិជាន់ស្លា ឃុំជីផាត ស្រុកថ្មបាំងខេត្តកោះកុង វាស្ថិតនៅចន្លោះគីឡូម៉ែត្រ៤៥-៤៦នៃកំណាត់ផ្លូវជាតិលេខ៤៨ក្នុងភូមិព្រលានឃុំអណ្តូងទឹក ស្រុកបុទុមសាគរ រួចបត់ស្តាំ (បើមកពីភ្នំពេញ) ចូលតាមផ្លូវក្រាលគ្រួសក្រហមចម្ងាយ១៨គីឡូម៉ែត្រ គឺមកដល់សាលាឃុំជីផាត និងមកដល់ទឹកធ្លាក់ឆាយខ្ពស់នេះហើយ។
២.ទឹកធ្លាក់អូរម្លូ
ដូចយើងបានដឹងមកហើយថា ស្រុកជីផាត គឺជាតំបន់អេកូទេសចរណ៍ដ៏សម្បូរបែបមួយពោរពេញទៅដោយសក្ដានុពលទៅលើកន្លែងដើរលេងបែបធម្មជាតិព្រៃព្រឹក្សា ដែលធ្វើឲ្យអ្នកទេសចរបានត្រជាក់ភ្នែក។ មិនខុសពីទឹកធ្លាក់ឆាយខ្ពស់ ទឹកធ្លាក់អូរម្លូ បានលាក់ខ្លួននៅក្នុងតំបន់អេកូជីផាតផងដែរ ហើយវាមានទីតាំងស្ថិតនៅអូរម្លូ ឃុំជីផាត ស្រុកថ្មបាំង ខេត្តកោះកុង។
៣.ទឹកធ្លាក់អូរស្រឡៅ
ទេសភាពស្រស់បំព្រងសំឡេងទឹកជ្រោះធ្លាក់ស្ថិតនៅចំកណ្ដាលព្រៃ ដែលនឹងនាំអារម្មណ៍របស់លោកអ្នកឲ្យភ្លេចអស់រាល់ទុកកង្វល់។
៤.ទឹកធ្លាក់អូរទឹកវេទ
អូរទឹកវេទជាទឹកធ្លាក់ធម្មជាតិស្ថិតក្នុងតំបន់ជីផាតដើម្បីទៅកាន់ទីនោះលោកអ្នកត្រូវធ្វើដំណើរឆ្លងទៅកាន់សហគមន៍អេកូទេសចរណ៍ជីផាត ដែលមានចម្ងាយប្រហែល១២៥គ.ម ពីក្រុងខេមរភូមិន្ទ និងប្រហែល ២១០គ.ម ពីរាជធានីភ្នំពេញ ធ្វើដំណើរតាមផ្លូវជាតិលេខ៤ និង៤៨ (ផ្លូវគ្រួសក្រហម ១៧គ.ម) ។
៥. ទឹកធ្លាក់ឆាយជ្រៃ
ទឹកធ្លាក់ឆាយជ្រៃ ឬក៏គេច្រើនហៅថា ទឹកជ្រោះឆាយជ្រៃមានទីតាំងស្ថិតនៅ ឃុំជីផាត ស្រុកថ្មបាំង ខេត្តកោះកុង និងមានចម្ងាយប្រហែល១២៤ គ.ម ពីរង្វង់មូល ខេត្តកោះកុង។ ទឹកធ្លាក់ឆាយជ្រៃស្ថិតនៅក្នុងប្រភេទ៖ ទឹកជ្រោះ ឬទឹកធ្លាក់, ទេសចរណ៍ធម្មជាតិ។ ចំណុចសំខាន់ៗនៅទឹកធ្លាក់ឆាយជ្រៃមានដូចជា៖ លេងទឹក ឬហែលទឹក, ទស្សនាទេសភាពព្រៃភ្នំ, រៀបចំអាហារដោយខ្លួនឯង, ដើរលេងដោយថ្មើរជើង និងចំណុចផ្សេងៗទៀត។
៦.ទឹកធ្លាក់អូរស្ប័ត
អូរស្ប័តជាទឹកធ្លាក់ធម្មជាតិស្ថិតក្នុងតំបន់ជីផាតដើម្បីទៅកាន់ទីនោះលោកអ្នកត្រូវធ្វើដំណើរឆ្លងកាន់សហគមន៍អេកូទេសចរណ៍ជីផាត ដែលមានចម្ងាយប្រហែល១២៥ គីឡូម៉ែត្រ ពីក្រុងខេមរភូមិន្ទ និងប្រហែល ២១០គីឡូម៉ែត្រ ពីរាជធានីភ្នំពេញ ធ្វើដំណើរតាមផ្លូវជាតិលេខ៤ និង៤៨ (ផ្លូវគ្រួសក្រហម ១៧គីឡូម៉ែត្រ)។ សម្រាប់អ្នកទេសចរដែលមានបំណងចង់ទៅទសទស្សនានៅតំបន់ជីផាត អាចទាក់ទងទៅកាន់សមាគមអេកូទេសចរណ៍ជីផាតដោយផ្ទាល់ក៏បាន៕
