រយៈពេល១១ខែឆ្នាំ២០២២នេះ ខេត្តកំពត មានភ្ញៀវទេសចរធ្វើដំណើរទៅកម្សាន្តជាង១លាន៧សែននាក់ក្នុងនោះមានភ្ញៀវទេសចរអន្តរជាតិជាង៤ម៉ឺននាក់ ដែលចំនួននេះបើប្រៀបធៀបឆ្នាំ២០២១គឺកើនឡើងជាង១០០ភាគរយនេះបើតាមការឲ្យដឹងពីប្រធានមន្ទីរទេសចរណ៍ខេត្តកំពតលោក សយ ស៊ីណុល ។ បើតាមលោក សយ ស៊ីណុល ការកើនឡើងនៃចំនួនភ្ញៀវទេសចរណ៏នេះគឺបន្ទាប់ពីរាជរដ្ឋាភិបាលគ្រប់គ្រងជំងឺកូវីដ-១៩បានល្អប្រសើ និងបានប្រកាសបើកប្រទេសឡើងវិញនូវវិស័យទេសចរណ៍នេះ និងបានធ្វើឲ្យចំនួនភ្ញៀវទេសចរស្ទុះងើបឡើងវិញយ៉ាងឆាប់រហ័ស។ ទាំងចំនួនភ្ញៀវទេសចរតំបន់រមណីយដ្ឋាន និងសេវាកម្មផ្សេងៗ មានការកើនឡើងច្រើនបើប្រៀបធៀបទៅនឹងមុនផ្ទុះជំងឺកូវីដ-១៩។ លោក សយ ស៊ីណុល បានឲ្យដឹងដែរថា ក្នុងនោះគោលដៅទេសចរណ៍ក៏បានកើនឡើងដល់ជាង៣០កន្លែងមានរមណីយដ្ឋាន២៣កន្លែង សហគមន៍ទេសចរណ៍០៤កន្លែងគោលដៅទាក់ទាញទេសចរ០៤កន្លែងទីតាំងបោះតង់០៥កន្លែង និងកន្លែងជាច្រើនទៀតកំពុងរៀបចំជាបន្តបន្ទាប់។
ខេត្តកំពតចែកចេញជាប៉ូលទេសចរណ៍សំខាន់ៗចំនួន៣ ដែលទេសចរនិយមទៅលេងច្រើនទី១.តំបន់ទឹកឈូ ទី២.តំបន់ភ្នំបូកគោ និងទី៣.តំបន់ទំនប់ម្លិច។ បើតាមប្រធានមន្ទីរ សេវាកម្មទេសចរណ៍ផ្សេងៗក៏មានការកើនឡើងផងដែរ ក្នុងនោះសេវាស្នាក់នៅកើនឡើងដល់ទៅជាង៤៦០០បន្ទប់ហើយបើរួមទាំងសេវាបោះតង់ទៀតនោះខេត្តកំពតមិនមានបញ្ហាខ្វះខាតបន្ទប់ស្នាក់នៅនោះទេ។ គួររំលឹកថា ខេត្តកំពតមានតំបន់ទេសចរណ៍ទាក់ទាញចំនួន២៥កន្លែងដែលមានដូចជា រមណីយដ្ឋានភ្នំបូកគោ, ទឹកឈូ, កំពង់ត្រាច់, ភ្នំឈ្ងោក, ដូងទេរ, ព្រែកត្នោត, ព្រែកកំពត, ឧទ្យានដងព្រែក, ទឹកធ្លាក់តាដា, ទំនប់ម្លិច, សហគមន៍ត្រពាំងសង្កែ, កសិ-ទេសចរណ៍ចម្ការម្រេច និងកន្លែងជាច្រើនទៀត សុទ្ធសឹងជាតំបន់ទេសចរណ៍ដែលស្ថិតនៅខេត្តកំពត។ ក្នុងចំណោមតំបន់ទាំងនោះ ភ្នំបូកគោ និងទឹកឈូ ជាគោលដៅទាក់ទាញបានភ្ញៀវទេសចរជាតិ និងអន្តរជាតិច្រើនជាងគេ៕
