ភ្នំពេញ៖ ទ្រនុងនៃសម្ពាធខ្ពស់ (ចិន) និងខ្យល់មូសុងឦសាន្តក្នុងកម្រិតមធ្យម នឹងបន្តជះឥទ្ធិពលមកលើកម្ពុជាចាប់ពីថ្ងៃទី២១ ដល់ថ្ងៃទី២៧ ខែធ្នូ ហើយឥទ្ធិពលនេះនឹងធ្វើឱ្យអាកាសធាតុនៅតំបន់នានាបន្តចុះត្រជាក់។ យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយមបានឱ្យដឹងនៅព្រឹកថ្ងៃទី២០ ខែធ្នូ ឆ្នាំ២០២២នេះថា ឥទ្ធិពលនេះ នឹងកើតឡើងនៅក្នុងមួយសប្ដាហ៍ខាងមុខ ហើយតំបន់ទំនាបកណ្ដាលនឹងមានសីតុណ្ហភាពអប្បបរមាពី១៨-២០អង្សាសេ និងសីតុណ្ហភាពអតិបរមាមានពី២៩-៣១អង្សាសេ ខណៈអាកាសធាតុចុះត្រជាក់ក្នុងកម្រិតបង្គួរ ។
ក្រសួងឱ្យដឹងបន្តថា នៅតំបន់ខ្ពង់រាបសីតុណ្ហភាពអប្បបរមាមានពី១៦-១៨ អង្សាសេ និងសីតុណ្ហភាពអតិបរមាមានពី២៨-៣០ អង្សាសេ ហើយអាកាសធាតុក៏ចុះត្រជាក់ក្នុងកម្រិតបង្គួរដែរខណៈខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ សីតុណ្ហភាពអប្បបរមា មានក្នុងរង្វង់១៧-១៨អង្សាសេ។ ជាមួយគ្នានេះក្រសួងធនធានទឹក និងឧតុនិយមបានឱ្យដឹងបន្តថា នៅតំបន់មាត់សមុទ្រសីតុណ្ហភាពអប្បបរមាមានពី ១៩-២១ អង្សាសេ និងសីតុណ្ហភាពអតិបរមាមានពី ២៩-៣១អង្សាសេ ហើយអាកាសធាតុចុះត្រជាក់ក្នុងកម្រិតមធ្យម ៕
