ភ្នំពេញ៖ សីតុណ្ហភាពអប្បបរមាអាចនឹងធ្លាក់ចុះដល់១៥អង្សាសេនៅតាមបណ្តាខេត្តនាតំបន់ភ្នំ និងជាប់ជួរភ្នំដងរែកនិងខ្ពង់រាបភាគឦសានចាប់ពីថ្ងៃទី១៨-២០ ខែធ្នូ ឆ្នាំ ២០២២ ដោយសារទ្រនុងសម្ពាធខ្ពស់ពីចិនបានធ្លាក់យ៉ាងគំហុគមកក្រោមជាមួយនឹងខ្យល់មូសុងបក់ក្នុងល្បឿនខ្លាំង។ យោងតាមសេចក្ដីជូនដំណឹងបន្ថែមរបស់ក្រសួងធនធានទឹក និងឧតុនិយមបានឱ្យដឹងនៅព្រឹកថ្ងៃទី១៦ ខែធ្នូ ឆ្នាំ២០២២នេះថា ចាប់ពីថ្ងៃទី១៨-២០ ខែធ្នូ ធាតុអាកាសអាចចុះត្រជាក់ខ្លាំងជាពិសេសនៅបណ្តាខេត្តនៅតំបន់ភ្នំ និងជាប់ជួរភ្នំដងរែកនិងខ្ពង់រាបភាគឦសាន ។
ស្ថានភាពបែបនេះ នឹងធ្វើឱ្យខេត្តមណ្ឌលគិរី រតនគិរី ព្រះវិហារ ឧត្តរមានជ័យ និងខេត្តប៉ៃលិន សីតុណ្ហភាពអប្បបរមាអាចនឹងធ្លាក់ចុះក្នុងរង្វង់ពី១៥-១៦អង្សាសេ។ ដោយឡែកខេត្តបន្ទាយមានជ័យ បាត់ដំបង សៀមរាប និងខេត្តស្ទឹងត្រែង សីតុណ្ហភាពអប្បបរមាអាចនឹងធ្លាក់ចុះក្នុងរង្វង់ពី១៧-១៨អង្សាសេ ខណៈរាជធានី និងបណ្តាខេត្តដទៃទៀតនឹងមានសីតុណ្ហភាពអប្បបរមាស្ថិតក្នុងរង្វង់២០អង្សាសេ។ យ៉ាងណាក៏ដោយក្រសួងបានបញ្ជាក់ថា នៅក្នុងអំឡុងពេលនោះដែរសង្កេតឃើញសីតុណ្ហភាពអតិបរមានៅវេលាថ្ងៃ មានពី២៦-២៩អង្សាសេ។ បន្ទាប់ពីថ្ងៃទី ២១ ខែធ្នូ សីតុណ្ហភាពអាចកើនឡើងពី២-៣អង្សាសេវិញ៕
