មុនពេលព្រឹត្ដិការណ៍រំលឹកគុណអង្គរឈានចូលមកដល់មួយថ្ងៃនៅព្រឹកថ្ងៃទី១៣ ខែធ្នូ ឆ្នាំ២០២២នេះ លោកបណ្ឌិត ហង់ ពៅ អគ្គនាយកអាជ្ញាធរជាតិអប្សរាអមដំណើរដោយថ្នាក់ដឹកនាំអាជ្ញាធរជាតិអប្សរារួមជាមួយសិស្សានុសិស្សសរុបចំនួនជិត១០០០នាក់បានធ្វើព្យុះហយាត្រាដង្ហែក្បួនដើម្បីឱ្យសាធារណៈជនក៍ដូចជាប្រជាពលរដ្ឋខ្មែរ ភ្ញៀវទេសចរជាតិ អន្ដរជាតិ មានការរំលឹកគុណដល់ប្រាសាទអង្គរជាបេតិកភណ្ឌពិភពលោកមិនអាចកាត់ថ្លៃបានដែលបុព្វបុរសខ្មែរបានបន្សល់ទុកឱ្យកូនខ្មែរជំនាន់ក្រោយ។

ថ្លែងក្នុងពិធីនោះលោក ហង់ ពៅ បានលើកឡើងថា ព្យុះហយាត្រាដែលមានមនុស្សចូលរួមជិតមួយពាន់នេះធ្វើឡើងជាលើកទី១នៃពិធីបុណ្យរំលឹកគុណអង្គរហើយជាសារមួយបង្ហាញថា កូនខ្មែរគ្រប់រូបបានតបស្នងសងគុណដល់បុព្វបុរសក៍ដូចជាអតីតព្រះមហាក្សត្រខ្មែរដែលបានកសាងប្រាសាទអង្គរទុកឱ្យកូនខ្មែរជំនាន់ក្រោយបានស្គាល់។ ព្រោះថាប្រាសាទអង្គរជាបេតិកភណ្ឌរស់រវើកដែលមិនអាចកាត់ថ្លៃបាន។ លោកបន្ដថា សម័យបច្ចេកវិទ្យាទំនើបនេះប្រទេសនៅលើពិភពលោកក៍អាចចម្លងឬកសាងប្រាសាទថ្មីធំៗបានដែរប៉ុន្ដែការសាងសង់ថ្មីគឺគ្មានតម្លៃ និងគ្មានន័យដូចប្រាសាទរបស់កម្ពុជាបានឡើយព្រោះប្រាសាទនេះមានអាយុកាលជាច្រើនពាន់ឆ្នាំមកហើយ ហើយក៍ជាដួងព្រឹលឹង និងអត្ដសញ្ញាណជាតិរបស់ខ្មែរ។

បើតាមលោក ហង់ ពៅ វប្បធម៌ អរិយធម៌ ដែលជាដួងព្រឹលឹងរបស់ខ្មែរមានច្រើនមហិមាមានអាយុរាប់រយឆ្នាំឬរាប់ពាន់ឆ្នាំមកហើយដូចនេះកូនខ្មែរគ្រប់រូបត្រូវដឹងគុណអង្គរ ដែលពាក្យមានន័យទូលំទូលាយបំផុតសម្រាប់មនុស្សជំនាន់ក្រោយត្រូវចូលរួមការអភិរក្ស និងអភិវឌ្ឍន៍ឱ្យបានគង់វង្ស។ គួររំលឹកថា ពិធីដង្ហែរក្បួននេះចាប់ផ្តើមឡើងចេញពីខាងមុខប្រាសាទអង្គរឆ្ពោះទៅកាន់ក្លោងទ្វារក្រុងអង្គរធំ ឬក្លោងទ្វារទន្លេអុំដោយមានកាន់នូវបដាជាភាសារខ្មែរផង និងភាសាបរទេសផងដែលរំលេចដោយអត្ថន័យដ៍ជ្រាលជ្រៅរបស់ប្រាសាទអង្គរដូចជា អង្គរជាដួងប្រលឹង និងជាអត្ដសញ្ញាណជាតិ អបអរសាទរពិធីបុណ្យរំលឹកគុណអង្គរ វប្បធម៌ជាមូលដ្ឋានគ្រិះនៃសន្ដិភាព និងការអភិវឌ្ឍសេដ្ឋកិច្ចសង្គមជាដើម៕