ភ្នំពេញ៖ កងអនុសេនាធំរាជអាវុធហត្ថលេខ៧៣៩ចំនួន៧៣នាក់ បានវិលត្រឡប់មកដល់កម្ពុជាវិញនាយប់ថ្ងៃទី១២ ខែធ្នូ ឆ្នាំ២០២២ ក្រោយពីបញ្ចប់បេសកកម្មមនុស្សធម៌រក្សាសន្តិភាពក្រោមឆត្រអង្គការសហប្រជាជាតិនៅសាធារណរដ្ឋស៊ូដងខាងត្បូង។ នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាមបានចាត់ទុកការធ្វើមាតុភូមិនិវត្តន៍មកដល់កម្ពុជាវិញថាបានរក្សានូវគំរូវីរភាពសមជាកងយោធពលខេមរភូមិន្ទ ដែលប្រកាន់ខ្ជាប់វិន័យតឹងរ៉ឹងដោយនូវមកនូវកិត្តិយជូនជាតិមាតុភូមិ។
នាយឧត្តមសេនីយ៍ សែម សុវណ្ណនី បានមានប្រសាសន៍លើកឡើងថា ភាពជោគជ័យរបស់កងអនុសេនាធំរាជអាវុធហត្ថលេខ៧៣៩រយៈពេល១ឆ្នាំនៅសាធារណរដ្ឋស៊ូដង់ខាងត្បូងគឺពិតជាទទួលបានការហ្វឹកហ្វឺនជំនាញបច្ចេកទេសត្រឹមត្រូវតាមនិយាមរបស់អង្គការសហប្រជាជាតិមុនចេញបេសកកម្ម ហើយរក្សាបាននូវសុវត្ថិភាព។ គិតចាប់តាំងពីឆ្នាំ២០០៦រហូតមកដល់ពេលនេះកម្ពុជាបានបញ្ជូនកងកម្លាំងរក្សាសន្តិភាពចំនួន៨៤៧៥នាក់ ទៅបំពេញបេសកកម្មមនុស្សធម៌ជាមួយអង្គការសហប្រជាជាតិនៅក្នុងប្រទេសចំនួន៩រួមមាន៖ ស៊ូដង់ ស៊ូដង់ខាងត្បូង, ឆាដ, លីបង់, ស៊ីរី, ម៉ាលី, អាហ្វ្រិកកណ្តាល សាយប្រឺស និងយ៉េមែន។ បច្ចុប្បន្នកម្ពុជា មានកម្លាំងកងទ័ពមួកខៀវជាង៨០០នាក់ កំពុងបំពេញបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិនៅស៊ូដង់ខាងត្បូង ម៉ាលី លីបង់ និងសាធារណរដ្ឋអាហ្វ្រិកកណ្តាល៕
