ភ្នំពេញ៖ បណ្ដាខេត្តចំនួន៤ស្ថិតនៅតំបន់ខ្ពង់រាប នឹងចុះត្រជាក់ក្នុងរង្វង់ពី១៦-១៨អង្សាសេ ខណៈមួយសប្ដាហ៍ខាងមុខកម្ពុជានឹងទទួលរងឥទ្ធិពលពីទ្រនុងសម្ពាធខ្ពស់ (ចិន) និងខ្យល់មូសុងឦសាន្តក្នុងកម្រិតពីបង្គួរទៅខ្លាំង។ ក្រសួងធនធានទឹក និងឧតុនិយមបានឱ្យដឹងនៅព្រឹកថ្ងៃទី១៣ ខែធ្នូ ឆ្នាំ២០២២នេះថា ស្ថានភាពបែបនេះនឹងធ្វើឲ្យតំបន់ទំនាបកណ្តាលមានសីតុណ្ហភាពអប្បបរមាមានពី១៨-២២អង្សាសេ និងសីតុណ្ហភាពអតិបរមាមានពី២៩-៣១អង្សាសេ។ ជាមួយគ្នានេះសីតុណ្ណភាពអប្បបរមា នឹងអាចចុះត្រជាក់ក្នុងរង្វង់ពី១៦-១៩អង្សាសេនៅខេត្តបន្ទាយមានជ័យ ប៉ៃលិន សៀមរាប និងខេត្តបាត់ដំបង ។
ក្រសួងឱ្យដឹងបន្តថា នៅតំបន់ខ្ពង់រាបសីតុណ្ហភាពអប្បបរមាមានពី១៦-១៩អង្សាសេ និងសីតុណ្ហភាពអតិបរមាមានពី២៨-៣០អង្សាសេ។ ជាមួយគ្នានេះសីតុណ្ហភាពអប្បបរមា នឹងអាចចុះត្រជាក់ក្នុងរង្វង់ពី១៦-១៨អង្សាសេនៅខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ ។ ដោយឡែកនៅតំបន់មាត់សមុទ្រសីតុណ្ហភាពអប្បបរមាមានពី ១៩-២១អង្សាសេសីតុណ្ហភាពអតិបរមាមានពី២៩-៣១អង្សាសេ ហើយសីតុណ្ហភាពអប្បបរមានឹងអាចចុះត្រជាក់ក្នុងរង្វង់ពី១៨-២០អង្សាសេខណៈនៅលើផ្ទៃសមុទ្រអាចមានរលកក្នុងកម្រិតពីមធ្យមទៅបង្គួរ៕
