ភ្នំពេញ៖ ប្រមុខរាជរដ្ឋាភិបាលកម្ពុជាបានឱ្យដឹងថា ផ្លូវពីភ្នំពេញឆ្ពោះទៅកាន់ខេត្តសៀមរាបកំពុងស្ថិតក្នុងការសិក្សាខណៈកម្ពុជាកំពុងខិតខំកសាងផ្លូវល្បឿនលឿនមួយខ្សែទៀតតភ្ជាប់ពីភ្នំពេញទៅបាវិតជាប់ព្រំដែនប្រទេសវៀតណាម។ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានឱ្យដឹងបែបនេះបន្ទាប់ពីមានអ្នកចូលទៅcomment ធ្វើផ្លូវល្បឿនលឿនមួយខ្សែទៀតពីភ្នំពេញទៅកាន់ខេត្តសៀមរាប។ សូមបញ្ជាក់ថា នាព្រឹកថ្ងៃទី៩ ខែធ្នូ ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានភ្ជាប់នឹងការបង្ហោះរូបថតមួយចំនួនដែលកំពុងធ្វើដំណើរតាមរថយន្តលើផ្លូវល្បឿនលឿនទៅកាន់ខេត្តព្រះសីហនុខណៈរាជរដ្ឋាភិបាល នឹងខិតខំកសាងផ្លូវល្បឿនលឿនមួយខ្សែទៀតតភ្ជាប់ពីភ្នំពេញទៅបាវិតព្រំដែនវៀតណាម។

សូមបញ្ជាក់ដែរថា នាពេលថ្មីៗនេះកម្ពុជាបានបើកឱ្យដំណើរផ្លូវល្បឿនលឿនភ្នំពេញ-ព្រះសីហនុដែលមានប្រវែងជិត១៩០គីឡូម៉ែត្រចំណាយថវិកាសាងសង់ប្រមាណ ២ពាន់លានដុល្លារ។ ដោយឡែកគម្រោងផ្លូវល្បឿនលឿនភ្នំពេញ-បាវិតត្រូវបានចុះហត្ថលេខាលើកិច្ចព្រមព្រៀងក្របខ័ណ្ឌកាលពីថ្ងៃទី១០ ខែវិច្ឆិកា ឆ្នាំ២០២២ ហើយគ្រោងបើកការដ្ឋានសាងសង់នៅពាក់កណ្តាលឆ្នាំ២០២៣ខាងមុខនេះ៕