ការបរិភោគទឹកដោះគោគឺជាវិធីដ៏ល្អមួយដើម្បីទទួលជាតិកាល់ស្យូម ប្រូតេអ៊ីន វីតាមីន និងសារធាតុជាច្រើនទៀត។

១. ទឹកដោះគោជួយរក្សាដង់ស៊ីតេឆ្អឹង

ទឹកដោះគោគឺជាប្រភពដ៏ល្អនៃជាតិកាល់ស្យូម និងផូស្វ័រ ដែលចាំបាច់សម្រាប់ការអភិវឌ្ឍ ថែរក្សាឆ្អឹង ធ្មេញឱ្យរឹងមាំ ជួយកាត់បន្ថយហានិភ័យនៃជំងឺពុកឆ្អឹង និងការបាក់ឆ្អឹងនៅពេលក្រោយក្នុងជីវិត។

២. ទឹកដោះគោជំរុញការលូតលាស់សាច់ដុំ

ប្រូតេអ៊ីនសំខាន់ៗនៅក្នុងទឹកដោះគោគឺ casein និង whey ដែលជួយក្នុងការកសាងម៉ាសសាច់ដុំគ្មានខ្លាញ់ និងកាត់បន្ថយជាតិខ្លាញ់នៅក្នុងខ្លួន។

៣. ទឹកដោះគោសំបូរទៅដោយវីតាមីន B

ទឹកដោះគោសម្បូរទៅដោយវីតាមីន B12, riboflavin (វីតាមីន B2) និង niacin (វីតាមីន B3) ដែលជួយបំប្លែងអាហារទៅជាថាមពល។ វីតាមីន B12 មានសារៈសំខាន់សម្រាប់ការបង្កើតកោសិកាឈាមក្រហម និងដំណើរការធម្មតានៃប្រព័ន្ធសរសៃប្រសាទកណ្តាល។

៤. ទឹកដោះគោត្រូវបានពង្រឹងជាមួយនឹងសារធាតុចិញ្ចឹមផ្សេងទៀត

សារធាតុចិញ្ចឹមផ្សេងទៀតរួមទាំងវីតាមីន A និង D ជាធម្មតាត្រូវបានបន្ថែមទៅក្នុងទឹកដោះគោ។ វីតាមីន A មានសារៈសំខាន់សម្រាប់​ជួយឲ្យចក្ខុវិស័យ​ល្អ និង​ជួយ​ពង្រឹង​ប្រព័ន្ធ​ភាពស៊ាំ ខណៈ​វីតាមីន D ជួយ​បង្កើន​សមត្ថភាព​របស់​រាងកាយ​ក្នុងការ​ស្រូប​យក​កាល់ស្យូម។

៥. ទឹកដោះគោអាចការពារប្រឆាំងនឹងជំងឺរ៉ាំរ៉ៃ

នៅក្នុងអត្ថបទទិនានុប្បវត្តិឆ្នាំ២០១៦ ដែលបោះពុម្ភផ្សាយក្នុងការស្រាវជ្រាវអាហារ និងអាហារូបត្ថម្ភ អ្នកស្រាវជ្រាវនៅអឺរ៉ុបបានពិនិត្យមើលភស្តុតាងវិទ្យាសាស្ត្រពីការសិក្សាដែលមានស្រាប់លើផលប៉ះពាល់សុខភាពនៃទឹកដោះគោ និងផលិតផលទឹកដោះគោ។ ភស្តុតាងដែលមានបានបង្ហាញថា ការទទួលទានទឹកដោះគោត្រូវបានផ្សារភ្ជាប់ជាមួយនឹងការថយចុះហានិភ័យនៃការធាត់ ជំងឺទឹកនោមផ្អែមប្រភេទទី២ ជំងឺបេះដូង ក៏ដូចជាមហារីកពោះវៀនធំ ប្លោកនោម ជំងឺក្រពះ និងជំងឺមហារីកសុដន់។

តើអ្នកគួរបរិភោគទឹកដោះគោចំនួនប៉ុន្មានក្នុងមួយថ្ងៃ?

យោងតាមក្រុមប្រឹក្សាលើកកម្ពស់សុខភាព របបអាហារប្រចាំថ្ងៃដែលត្រូវបានណែនាំសម្រាប់ការបរិភោគដែលមានជាតិកាល់ស្យូមគឺ 800mg ក្នុងមួយថ្ងៃសម្រាប់មនុស្សដែលមានអាយុពី១៩ទៅ៥០ឆ្នាំ។ មនុស្សចាស់គួរតែទទួលទានទឹកដោះគោឲ្យបានច្រើន (1,000mg) ។ នេះមានន័យថាអ្នកគួរតែទទួលទានទឹកដោះគោពី២ទៅ៣ដងជារៀងរាល់ថ្ងៃ ដែលជាផ្នែកមួយនៃរបបអាហារមានតុល្យភាពមិនលើសពីបីកែវក្នុងមួយថ្ងៃហើយក្នុងមួយកែវមានចំណុះ 250ml នៃទឹកដោះគោ។