ភ្នំពេញ៖ មន្ទីរសម្រាកព្យាបាលដើមអង្រ្កង ដែលបង្ករឿងអាស្រូវលើនារីមានផ្ទៃពោះម្នាក់រហូតរងគ្រោះធ្ងន់ធ្ងរត្រូវបានរដ្ឋមន្រ្តីក្រសួងសុខាភិបាល សម្រេចបិទទ្វារជាស្ថាពរ និងឱ្យទទួលខុសត្រូវលើអ្នកជំងឺចំពោះមុខច្បាប់។ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបានមានប្រសាសន៍ថា ក្រសួងសម្រេចបិទនិងដកហូតលិខិតអនុញ្ញាតឱ្យបើកមន្ទីរសំរាកព្យាបាលឯកជនឈ្មោះដើម អង្រ្កងដែលមានទីតាំងនៅផ្ទះគ្មានលេខផ្លូវជាតិលេខ៣ ឃុំអង្គពពេល ស្រុកគងពិសី ខេត្តកំពង់ស្ពឺ របស់លោកស្រីសដ្ឋបណ្ឌិត សូស ច័ន្ទរស្មី ជាអ្នកទទួលខុសត្រូវដោយមូលហតុប្រើប្រាស់បុគ្គលិកផ្សេងគ្មានការបណ្តុះបណ្តលគ្មានការចុះបញ្ជីគណៈវិជ្ជាជីវៈ និងប្តូរទីតាំងដោយគ្មានការជូនដំណឹងដល់ក្រសួងសុខាភិបាល។
រដ្ឋលេខាធិការក្រសួងសុខាភិបាលបានគួសបញ្ជាក់ថា ចំពោះអ្នកទទួលខុសត្រូវនិងម្ចាស់មន្ទីរសំរាកព្យាបាលដើមអង្រ្កង និងអ្នកដែលបានប្រព្រឹត្តខុសនឹងក្រមសីលធម៌វិជ្ជាជីវៈពេទ្យខុសបច្ចេកទេសក្នុងការពិនិត្យនិងព្យាបាលអ្នកជំងឺត្រូវទទួលខុសត្រូវចំពោះមុខច្បាប់ជាធរមាន។ សូមរំលឹកថា មន្ទីរសម្រាកព្យាបាលដើមអង្រ្កង ស្ថិតក្នុងស្រុកគងពិសី ខេត្តកំពង់ស្ពឺ មានរឿងអាស្រូវកើតឡើងក្រោយពេលបង្កឱ្យស្រ្តីម្នាក់បានរងគ្រោះធ្ងន់ធ្ងរដោយសារការរំលូតគភ៌។ បច្ចុប្បន្នស្ត្រីរងគ្រោះឈ្មោះ សឿន ស្រីអូន កំពុងសម្រាកព្យាបាល និងជួយសង្រ្គោះអាយុជីវិតនៅមន្ទីរពេទ្យកាល់ម៉ែតក្រោមការយកចិត្តទុកដាក់ជួយគាំទ្រដល់ការព្យាបាលទាំងស្រុងពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា៕
