អ៊ុយក្រែនបានចោទប្រកាន់រុស្ស៊ីពីបទបំផ្លាញផ្ទះនៅភាគអាគ្នេយ៍ និងផ្តាច់ថាមពលនៅក្នុងតំបន់ជាច្រើនដោយប្រើប្រាស់កាំជ្រួចមីស៊ីលផ្លោងថ្មីកាលពីថ្ងៃចន្ទ ខណៈដែលរុស្ស៊ីបាននិយាយថាយន្តហោះគ្មានមនុស្សបើករបស់អ៊ុយក្រែនបានវាយប្រហារមូលដ្ឋានទ័ពអាកាសចំនួនពីរក្នុងប្រទេសរុស្ស៊ីដែលមានចម្ងាយរាប់រយគីឡូម៉ែត្រពីជួរមុខ។ ការវាយប្រហារដោយកាំជ្រួចមីស៊ីលបានធ្វើឲ្យតំបន់ខ្លះនៅក្នុងប្រទេសអ៊ុយក្រែនធ្លាក់ទៅក្នុងភាពងងឹត និងត្រជាក់ជាមួយសីតុណ្ហភាពបច្ចុប្បន្នធ្លាក់ក្រោមសូន្យអង្សាសេដែលស្មើរនឹង៣២ហ្វារិនហៃ។ ប្រធានាធិបតីអ៊ុយក្រែនលោក Volodymyr Zelenskyy មានអនុសាសន៍ថា មនុស្សយ៉ាងតិចណាស់ចំនួន៤នាក់បានស្លាប់នៅក្នុងការវាយប្រហាររបស់រុស្ស៊ី ហើយបន្ថែមពីនេះចំណោមកាំជ្រួចមីស៊ីល៧០កាំជ្រួចមីស៊ីលមួយចំនួនធំត្រូវបានបាញ់ទម្លាក់ដោយកងកម្លាំងអ៊ុយក្រែន។ លោក​បាន​បន្ត​ថា បុគ្គលិក​ថាមពល​បាន​ចាប់​ផ្តើម​ធ្វើ​ការ​រួច​ហើយ​លើ​ការ​ស្ដារ​ឡើងវិញនូវការផ្គត់​ផ្គង់​ថាមពល។

ក្រសួងការពារជាតិនៃប្រទេសស្ស៊ីបាននិយាយថា យន្តហោះគ្មានមនុស្សបើករបស់អ៊ុយក្រែនបានវាយប្រហារមូលដ្ឋានទ័ពអាកាសចំនួនពីរនៅតំបន់ Ryazan និងតំបន់ Saratov ដែលនៅភាគនិរតីនៃប្រទេសរុស្ស៊ី ដែលបង្កឲ្យទាហានរុស្ស៊ីចំនួន៣នាក់ស្លាប់និង៤នាក់របួសជាមួយនឹងយន្តហោះពីរគ្រឿងដែលរងការខូចខាតជាបំណែកនៃយន្តហោះគ្មានមនុស្សបើកនៅពេលដែលត្រូវបានបាញ់ទម្លាក់។ យ៉ាងណាមិញ អ៊ុយក្រែន​មិន​បាន​អះអាង​ទទួល​ខុស​ត្រូវ​ដោយ​ផ្ទាល់​ចំពោះ​ការ​វាយ​ប្រហារ​នេះ​ទេ។ គោលដៅមួយក្នុងចំណោមនោះគឺជាមូលដ្ឋានទ័ពអាកាស Engels ក្បែរទីក្រុង Saratov ចម្ងាយប្រហែល៧៣០km(៤៥០ម៉ាយ)ភាគអាគ្នេយ៍នៃទីក្រុងមូស្គូមានយន្តហោះទម្លាក់គ្រាប់បែកដែលជាកម្មសិទ្ធិរបស់កងកម្លាំងនុយក្លេអ៊ែរយុទ្ធសាស្ត្ររបស់រុស្ស៊ី។ ក្រសួងការពារជាតិនៃប្រទេសរុស្ស៊ីបាននិយាយថា "ដើម្បីបិទយន្តហោះរយៈចម្ងាយឆ្ងាយរបស់រុស្ស៊ី Kyiv បានព្យាយាមវាយប្រហារយន្តហោះគ្មានមនុស្សបើកដែលផលិតដោយសូវៀតនៅឯអាកាសយានដ្ឋានយោធា Dyagilevo ក្នុងតំបន់ Ryazan និង Engels ក្នុងតំបន់ Saratov" ។

ក្រសួងបានបន្តទៀតថា យន្តហោះគ្មានមនុស្សបើកដែលហោះហើរក្នុងរយៈកម្ពស់ទាបត្រូវបានបាញ់ទម្លាក់និងស្ទាក់ចាប់ដោយប្រព័ន្ធការពារអាកាស។ ក្រសួងការពារជាតិនៃប្រទេសរុស្ស៊ីបានហៅយន្តហោះដ្រូននេះ ថាជាសកម្មភាពភេរវកម្មក្នុងគោលបំណងរំខានដល់អាកាសចរណ៍រយៈចម្ងាយឆ្ងាយរបស់ខ្លួន។ ទោះបីជាយ៉ាងណាក៏ដោយ ក្រសួងបាននិយាយថាប្រទេសរុស្ស៊ីបានឆ្លើយតបជាមួយនឹង “ការវាយប្រហារដ៏ធំលើប្រព័ន្ធគ្រប់គ្រងយោធា និងវត្ថុពាក់ព័ន្ធនៃការការពារមជ្ឈមណ្ឌលទំនាក់ទំនង និងអង្គភាពយោធានិងថាមពលនៃប្រទេសអ៊ុយក្រែនជាមួយនឹងអាវុធដែលមានមូលដ្ឋានលើអាកាស និងសមុទ្រដែលមានភាពជាក់លាក់ខ្ពស់” ដែលក្នុងនោះគោលដៅដែលបានកំណត់ទាំង១៧ត្រូវបានវាយកម្ទេច។ ការកំណត់គោលដៅគ្រឿងបរិក្ខារថាមពលកងកម្លាំងអាកាសរបស់អ៊ុយក្រែនបាននិយាយថា ខ្លួនបានបាញ់ទម្លាក់កាំជ្រួចមីស៊ីលជាង៦០ គ្រាប់ក្នុងចំណោមជាង ៧០គ្រាប់ដែលត្រូវបានបាញ់ដោយប្រទេសរុស្ស៊ីកាលពីថ្ងៃចន្ទ ដែលជាការវាយប្រហារចុងក្រោយបំផុតក្នុងប៉ុន្មានសប្តាហ៍នៃការវាយកម្ទេចទៅលើហេដ្ឋារចនាសម្ព័ន្ធសំខាន់ៗរបស់ខ្លួនដែលបានកាត់ផ្តាច់ថាមពល កំដៅ និងទឹកទៅកាន់តំបន់ជាច្រើននៃប្រទេស។

កងកម្លាំងទីក្រុង Kyiv ក៏បានបង្ហាញពីសមត្ថភាពកាន់តែខ្លាំងឡើងក្នុងការវាយបំបែកគោលដៅយុទ្ធសាស្ត្ររបស់រុស្ស៊ី ដែលនៅឆ្ងាយហួសពីខ្សែបន្ទាត់ជួរមុខប្រវែង១ ១០០ គីឡូម៉ែត្រ (៦៨៤ម៉ាយ) នៅភាគខាងត្បូង និងខាងកើតនៃប្រទេសអ៊ុយក្រែន។ តំបន់ Saratov មានចម្ងាយយ៉ាងហោចណាស់៦០០គីឡូម៉ែត្រពីទឹកដីអ៊ុយក្រែន។ អ្នកអត្ថាធិប្បាយរុស្ស៊ីបាននិយាយនៅលើប្រព័ន្ធផ្សព្វផ្សាយសង្គម ថាប្រសិនបើអ៊ុយក្រែនអាចវាយលុកបានឆ្ងាយនៅក្នុងប្រទេសរុស្ស៊ីនោះ អ៊ុយក្រែនក៏អាចមានលទ្ធភាពវាយលុកទីក្រុងម៉ូស្គូផងដែរ។ ទន្ទឹមនឹងនេះរុស្ស៊ីក៏បាននឹងកំពុងវាយលុកហេដ្ឋារចនាសម្ព័ន្ធថាមពលរបស់អ៊ុយក្រែនស្ទើរតែរៀងរាល់សប្តាហ៍ចាប់តាំងពីដើមខែតុលាមក។ អនុប្រធានការិយាល័យប្រធានាធិបតីលោក Kyrylo Tymoshenko បាននិយាយថានៅក្នុងតំបន់ Zaporizhia យ៉ាងហោចណាស់មនុស្សចំនួនពីរនាក់បានស្លាប់ និងផ្ទះជាច្រើនខ្នងត្រូវបានបំផ្លាញ។ ក្រុមមន្ត្រីបាននិយាយថា កាំជ្រួចមីស៊ីលក៏បានវាយប្រហារទីតាំងថាមពលនៅក្នុងតំបន់នៃទីក្រុង Kyiv ដែលមានតំបន់ Vinnytsia នៅកណ្តាលអ៊ុយក្រែនតំបន់ Odesa នៅភាគខាងត្បូង និងតំបន់ Sumy នៅភាគខាងជើងនៃប្រទេសអ៊ុយក្រែន។ អភិបាល​តំបន់លោក Oleksiy Kuleba ​បាន​និយាយ​ថា៤០ភាគរយ​នៃ​តំបន់ Kyiv គ្មានថាមពល​អគ្គិសនីសម្រាប់​ប្រើប្រាស់។