ប្រធានាធិបតី​អាមេរិក និង​បារាំង​ប្តេជ្ញា​ឲ្យ​រុស្ស៊ី​ទទួល​ខុស​ត្រូវ​ចំពោះ “អំពើ​ឃោរឃៅ និង​ឧក្រិដ្ឋកម្ម​សង្រ្គាម” ក្នុងការ​ឈ្លានពាន​អ៊ុយក្រែន។ សហរដ្ឋអាមេរិកនិងបារាំងបានសន្យាថានឹងរក្សាការគាំទ្រអ៊ុយក្រែនក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ីដោយសង្កត់ធ្ងន់ថា រុស្ស៊ីត្រូវទទួលខុសត្រូវចំពោះការវាយប្រហារលើជនស៊ីវិល និងហេដ្ឋារចនាសម្ព័ន្ធស៊ីវិលនៅក្នុងប្រទេសអ៊ុយក្រែន។ នៅក្នុងសេចក្តីថ្លែងការណ៍មួយដែលបង្ហាញពីការពិភាក្សារវាងប្រធានាធិបតីអាមេរិកលោក Joe Biden និងសមភាគីបារាំងលោក Emmanuel Macron នៅសេតវិមានកាលពីថ្ងៃព្រហស្បតិ៍ថា ប្រទេសទាំងពីរបានថ្កោលទោសប្រទេសរុស្ស៊ីពីបទឈ្លានពាននិងប្រឆាំងប្រទេសជិតខាងរបស់ខ្លួនដោយខុសច្បាប់។ ទទឹមនឹងនោះលោក Biden និង Macron ក៏បានបញ្ជាក់ឡើងវិញនូវការប្តេជ្ញាចិត្តដ៏ខ្ជាប់ខ្ជួនក្នុងការរក្សាប្រទេសរុស្ស៊ីឲ្យទទួលខុសត្រូវចំពោះអំពើឃោរឃៅ និងឧក្រិដ្ឋកម្មសង្គ្រាមដែលត្រូវបានកត់ត្រាយ៉ាងទូលំទូលាយ ដែលប្រព្រឹត្តដោយកងកម្លាំងប្រដាប់អាវុធធម្មតានិងដោយអ្នកតំណាងរបស់ខ្លួន"។

លោក Biden បាននិយាយនៅក្នុងសន្និសីទសារព័ត៌មានមួយជាមួយលោក Macron បន្ទាប់ពីកិច្ចពិភាក្សាថា "យើងបញ្ជាក់សារជាថ្មីថា បារាំង និងសហរដ្ឋអាមេរិករួមគ្នាជាមួយសម្ព័ន្ធមិត្តណាតូទាំងអស់ សហភាពអឺរ៉ុប និង G7 ឈរយ៉ាងរឹងមាំក្នុងការប្រឆាំងនឹងសង្រ្គាមដ៏ឃោរឃៅរបស់រុស្ស៊ីប្រឆាំងនឹងអ៊ុយក្រែន" ។ ប្រធានាធិបតីអាមេរិកបានប្រាប់អ្នកយកព័ត៌មានថា បារាំង និងសហរដ្ឋអាមេរិកកំពុងប្រឈមមុខនឹងមហិច្ឆតារបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន ក្នុងដណ្តើមយកជ័យជំនះនិងការពារតម្លៃប្រជាធិបតេយ្យ និងសិទ្ធិមនុស្សជាសកល។

កិច្ចពិភាក្សាកាលពីថ្ងៃព្រហស្បតិ៍រវាងលោក Biden និងលោក Macron បានកើតឡើងនៅពេលដែលអភិបាលក្រុង Kyiv លោក Vitaliy Klitschko បានជំរុញឱ្យប្រជាជននៃរដ្ឋធានីអ៊ុយក្រែនស្តុកទឹក អាហារ និងសម្លៀកបំពាក់កក់ក្តៅនៅក្នុងព្រឹត្តិការណ៍នៃការដាច់ភ្លើងទាំងស្រុង។ លើសពីនេះលោកអភិបាលក្រុងក៏បានណែនាំដល់ប្រជាជន​បើអាចឱ្យ​ពិចារណា​នៅ​ជាមួយ​មិត្តភ័ក្តិ​នៅតំបន់​ជាយ​ក្រុង​។ គ្រាប់រ៉ុក្កែតរុស្ស៊ីបានវាយលុកទីក្រុង Kherson ក្នុងពេលមួយយប់។ ការវាយប្រហារនេះបានផ្តាច់ការផ្គត់ផ្គង់ថាមពល បន្ទាប់ពីអគ្គិសនីទើបតែចាប់ផ្តើមត្រូវបានស្តារឡើងវិញអស់រយៈពេលជិត៣សប្តាហ៍។ អ្នកស្រុកមួយចំនួនបានឱបក្រុមទាហានអ៊ុយក្រែនខណៈដែលពួកគេដើរល្បាតតាមរថយន្ត និងអគារដែលឆេះដោយការបាញ់ផ្លោងពេញមួយយប់បណ្តាលឲ្យមនុស្សមួយចំនួនត្រូវសម្រាកព្យាបាលនៅមន្ទីរពេទ្យ។