ភ្នំពេញ៖ រដ្ឋមន្រ្តីក្រសួងសុខាភិបាលបានរំឭកដល់អ្នកបម្រើសេវាសុខាភិបាលឯកជននៅតាមមូលដ្ឋានត្រូវអនុវត្តឱ្យបានត្រឹមត្រូវតាមលក្ខណបច្ចេកទេសក្រោយពីមានលេចចេញជាបាតុភាពជាបន្តបន្ទាប់។ លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានមានប្រសាសន៍នៅក្នុងសេចក្ដីណែនាំមួយថា ក្រសួងតែងតែធ្វើការណែនាំក្រើនរំឭក និងបានចេញសេចក្តីណែនាំជាបន្តបន្ទាប់ជូនដល់រដ្ឋបាលថ្នាក់ក្រោមជាតិ និងមន្ទីរសុខាភិបាលនៃរដ្ឋបាលរាជធានី-ខេត្តព្រមទាំងម្ចាស់មូលដ្ឋានសុខាភិបាលឯកជនទាំងអស់។

លោកបានលើកឡើងថា ក្នុងពេលថ្មីៗនេះក្រសួងបានចេញផ្សាយនូវសេចក្ដីណែនាំស្តីពីការពង្រឹងសេវាសង្គ្រោះបន្ទាន់ក្នុងមន្ទីរពេទ្យសេវារថយន្តសង្គ្រោះ ដើម្បីជួយសង្គ្រោះបន្ទាន់ ឬដឹកអ្នករងរបួសធ្ងន់ព្រមទាំងការផ្សព្វផ្សាយពីច្បាប់និងបទដ្ឋានគតិយុត្តជាដើម។ រដ្ឋមន្រ្តីក្រសួងសុខាភិបាលបានណែនាំដល់អ្នកគ្រប់គ្រង និងអ្នកប្រកបវិជ្ជាជីវៈវិស័យសុខាភិបាលឯកជនទាំងអស់ចាំបាច់ត្រូវខិតខំគ្រប់គ្រងដំណើរការរបស់ខ្លួនឱ្យបានល្អប្រសើរត្រឹមត្រូវតាមលក្ខណបច្ចេកទេសសុខាភិបាលត្រូវតែគោរពអនុវត្តតាមតួនាទីភារកិច្ច និងក្រមសីលធម៌វិជ្ជាជីវៈរៀងៗខ្លួនដោយអនុលោមតាមច្បាប់ជាធរមាន។

ជាមួយគ្នានេះ លោក ម៉ម ប៊ុនហេង បានសង្កត់ធ្ងន់ថា អ្នកដែលប្រព្រឹត្តខុសឆ្គងពីវិជ្ជាជីវៈ ឬមានការធ្វេសប្រហែសលើការងារគ្រប់គ្រងមូលដ្ឋានសុខាភិបាលឯកជនរបស់ខ្លួន ឬធ្វើឱ្យមានកំហុសបច្ចេកទេសធ្ងន់ណាមួយបន្ថែមលើការដាក់វិន័យនៃគណៈវិជ្ជាជីវៈនីមួយៗនិងត្រូវប្រឈមទៅនឹងច្បាប់ទៅតាមសណ្ឋានទម្ងន់ទោសដែលមានចែង ផងដែរ៕