ភ្នំពេញ៖ លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញបានបញ្ជាដល់ការិយាល័យអត្តសញ្ញាណបណ្ណសញ្ញាតខ្មែរឱ្យចាប់ផ្តើមរៀបចំចុះធ្វើអត្តសញ្ញាណបណ្ណសញ្ជាតិខ្មែរតាមខ្នងផ្ទះប្រជាពលរដ្ឋ។នៅក្នុងកិច្ចប្រជុំមួយនាព្រឹកថ្ងៃទី៣០ ខែវិច្ឆិកា ឆ្នាំ២០២២នេះ លោកឧត្តមសេនីយ៍ឯក ស ថេតបានលើកឡើងពីការជម្រុញបន្ថែមក្នុងការផ្សព្វផ្សាយដើម្បីពន្លឿនក្នុងការធ្វើអត្តសញ្ញាណបណ្ណសញ្ជាតិខ្មែរប្រភេទថ្មីជូនដល់ប្រជាពលរដ្ឋទាំង២ភេទដែលគ្រប់អាយុ១៥ឆ្នាំ។
ស្នងការនគរបាលរាជធានីភ្នំពេញបានណែនាំដល់មន្ត្រីទទួលការងារអត្តសញ្ញាណប័ណ្ណសញ្ជាតិខ្មែរទាំងអស់ត្រូវរៀបចំធ្វើជាតារាងផែនការម៉ោងវេលាទីកន្លែងឲ្យច្បាស់លាស់ដោយចាប់ផ្តើមធ្វើយុទ្ធនាការចុះធ្វើជូនប្រជាពលរដ្ឋដល់តាមភូមិ និងតាមខ្នងផ្ទះហើយក្នុងករណីមានការសួរនាំផ្សេងៗមន្ត្រីពាក់ព័ន្ធត្រូវមានការបញ្ជាក់ហេតុផលឲ្យបានច្បាស់លាស់ និងសមរម្យជាមួយប្រជាពលរដ្ឋ។ ជាមួយគ្នានេះលោកឧត្តមសេនីយ៍ឯក ស ថេត បានណែនាំដល់មន្ត្រីពាក់ព័ន្ធត្រូវពន្យល់ប្រជាពលរដ្ឋឲ្យបានយល់ច្បាស់ នៅពេលដែលមានការសុំកែអក្សរឡាតាំងថ្ងៃខែឆ្នាំកំណើត គឺត្រូវផ្តោតសំខាន់លើសំបុត្រកំណើត៕
