នៅថ្ងៃទី២៨ ខែវិច្ឆិកា ឆ្នាំ២០២២នេះ គឺជាខួបខួប៤ឆ្នាំ(២៨ វិច្ឆិកា ២០១៨-២៨ វិច្ឆិកា ២០២២)នៃការដាក់បញ្ចូលល្ខោនខោលវត្តស្វាយអណ្តែតក្នុងបញ្ជីបេតិកភណ្ឌ វប្បធម៌អរូបីនៃមនុស្សជាតិរបស់អង្គការយូណេស្កូ។ នៅថ្ងៃនេះក្រសួងវប្បធម៌ និងវិចិត្រ សិល្បៈ ក៏បានបង្ហោះវីដេមួយ ដើម្បីអបអរសាទរថ្ងៃប្រវត្តិសាស្ត្រនេះផងដែរ។ ល្ខោនខោលវត្តស្វាយអណ្តែតតំណាងឱ្យល្ខោនខោលកម្ពុជាត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូនៅថ្ងៃទី២៨ ខែវិច្ឆិកា ២០១៨ នៅទីក្រុងព័រល្វី សាធារណរដ្ឋម៉ូរី ។

គួរបញ្ជាក់ថា ល្ខោនខោល ជាល្ខោនមួយបែបដែលពាក់មុខខ្មុកសម្តែងហើយជាទូទៅតួអង្គសុទ្ធតែមនុស្សប្រុស និងសម្តែងបានតែក្នុងឈុតឆាករឿងរាមកេរ្តី៍តែប៉ុណ្ណោះ។ ល្ខោននេះធ្វើកាយវិការតាមសំឡេងពោល ហើយកំដរដោយភ្លេងពិណពាទ្យ។ ផ្អែកទៅលើការសិក្សាតាមរយៈសិលាចារឹកបុរាណអ្នកស្រាវជ្រាវយល់ថា ល្ខោនខោល មានដើមកំណើតពីល្ខោនភាណីជាប្រភេទល្ខោនដែលមានអ្នកពោលរៀបរាប់សាច់រឿង ហើយឃើញមានយ៉ាងហោចណាស់ក៏ចាប់ពីសម័យអង្គរ សតវត្សទី៩ដល់១៤។ សព្វថ្ងៃនេះសង្កេតឃើញមានការសម្តែងល្ខោនខោលពីរបែបគឺដើម្បីកំសាន្ត ឬជាប់នឹងកិច្ចសាសនាបន្តិចបន្តួចនិងល្ខោនដែលនៅជាប់នឹងជំនឿក្នុងសហគមន៍៕