ភ្នំពេញ៖ រដ្ឋមន្ដ្រីក្រសួងសុខាភិបាលបានជម្រាបជូនគណៈអភិបាលរាជធានីខេត្តធ្វើការណែនាំដល់មន្ទីរពេទ្យ មណ្ឌលសុខភាព ដើម្បីសហការគ្នាពង្រឹងសេវារថយន្តសង្គ្រោះបន្ទាន់ដោយមិនតម្រូវឲ្យបង់ថ្លៃសេវាដឹកជញ្ជូន និងសេវារថយន្តដឹកសព។ លោក ម៉ម ប៊ុនហេង រដ្ឋមន្ដ្រីក្រសួងសុខាភិបាលបានមានប្រសាសន៍ថា ក្រសួងធ្លាប់បានធ្វើការណែនាំករណីរថយន្តសង្គ្រោះបន្ទាន់ដឹកអ្នកគ្រោះ ដោយគ្រោះថ្នាក់អាចណ៍ដោយមិនតម្រូវឱ្យបង់ថ្លៃរសវា និងរួមទាំងរថយន្តដឹកសព (ស្លាប់ក្នុងមន្ទីរពេទ្យ ឬដោយគ្រោះថ្នាក់ចរាចរណ៍) ដឹកពីមន្ទីរពេទ្យ ឬកន្លែងគ្រោះថ្នាក់ចរាចរណ៍ទៅកាន់លំនៅដ្ឋានសព។
លោកបានលើកឡើងទៀតថា កន្លងមកមន្ទីរសុខាភិបាលនៃរដ្ឋបាលរាជធានី-ខេត្តទាំងអស់ក៏បានធ្វើការណែនាំដល់មន្ទីរពេទ្យ មណ្ឌលសុខភាព ដើម្បីសហការគ្នាពង្រឹង សេវារថយន្តសង្គ្រោះបន្ទាន់ជាពិសេសសម្រាប់អ្នករងគ្រោះថ្នាក់ចរាចរណ៍ បាក់បែកឆ្អឹង ហូរឈាម ឬសន្លប់ត្រូវការសង្រ្គោះអាយុជីវិត ដើម្បីចូលរួមចំណែកកាត់បន្ថយអត្រាស្លាប់ដោយគ្រោះថ្នាក់ចរាចរណ៍។ លោក ម៉ម ប៊ុនហេង រដ្ឋមន្ដ្រីក្រសួងសុខាភិបាលបានស្នើដល់អភិបាលនៃគណៈអភិបាលរាជធានី-ខេត្ត ទាំងអស់យកចិត្តទុកដាក់ឱ្យប្រធានមន្ទីរសុខាភិបាលពង្រឹងសេវាសង្រ្គាះបន្ទាន់ក្នុងមន្ទីរពេទ្យសេវាថយន្តគិលានលានសង្គ្រោះដើម្បីជួយសង្គ្រោះបន្ទាន់ ឬដឹកអ្នករងរបួសធ្ងន់ធ្ងរជាពិសេសអ្នករងគ្រោះថ្នាក់ចរាចរណ៍ដោយមិនតម្រូវឲ្យបង់ថ្លៃសេវាដឹកជញ្ជូន និងសេវារថយន្តដឹកសពទៅលំនៅដ្ឋាននៃសពដោយការទទួលខុសត្រូវខ្ពស់៕
